Սահմանադրական դատարանը Ռոբերտ Քոչարյանի դիմումի վերաբերյալ որոշումը կհրապարակի սեպտեմբերի 4-ին։ Սահմանադրական դատարանն այսօր քննում էր Մարտի 1-ի գործով առանցքային մեղադրյալ Ռոբերտ Քոչարյանի դիմումը, ըստ այդմ՝ մեղադրյալը Սահմանադրական դատարանին խնդրում է ստուգել Քրեական դատավարության օրենսգրքի միաժամանակ երկու՝ խափանման միջոց կիրառելու հիմքերի և քրեական գործի վարույթը կամ քրեական հետապնդումը բացառող հանգամանքների մասին հոդվածների սահմանադրականությունը։
Ի դեպ, ընդհանուր իրավասության դատարանի դատավոր Աննա Դանիբեկյանն այսօր նշանակել է Ռոբերտ Քոչարյանի, Յուրի Խաչատուրովի, Արմեն Գևորգյանի և Սեյրան Օհանյանի մասով Մարտի 1-ի գործի առաջին դատական նիստի օրը։ Այն տեղի է ունենալու սեպտեմբերի 12-ին։ Դատավորը միանգամից նշանակել է դատական նիստի օրը, առանց խափանման միջոցի փոփոխության հարց քննարկելու նիստերի։ Կան պնդումներ, որ սա պատասխանն էր Սահմանադրական դատարանի հակաօրինական գործողությունների։ Դուք ի՞նչ կարծիքի եք․ «Առաջին լրատվական»-ի հարցին «Իրավունքի Եվրոպա» հասարակության նախագահ, փաստաբան Լուսինե Հակոբյանը պատասխանեց․ «Ես կդժվարանամ համարել, որ դատական համակարգի ներսում ինչ-որ մի դատավոր կամ ինչ-որ մի սուբյեկտ նման դեմարշ է իրականացնում Սահմանադրական դատարանի գործողությունների նկատմամբ։
Եթե Սահմանադրական դատարանը կայացնի որոշում, որով կմերժի և կասի, որ Քրեական օրենսգրքի խնդրո առարկա հոդվածները համապատասխանում են Սահմանադրությանը, ապա դա դեռևս չի նշանակում, որ ինքնին այդ որոշումը դիմումը մերժող կլինի, որովհետև կարող է համարել, որ համապատասխանում են դրանք Սահմանադրությանը, բայց դրանց տա մի այնպիսի բովանդակություն, որով, ըստ էության, կբավարարի նրանց դիմումը։ Այսինքն՝ այն, որ կհամարի Սահմանադրությանը համապատասխանող, դա դեռ չի նշանակում, որ դա ոչինչ չի փոխի գործում»։
Մանրամասները՝ տեսանյութում։
