«Ռուսական Рен ТВ, Россия 24 հեռուստաալիքների հրապարակումները Քոչարյանի մասով պետք է դիտել հիբրիդային պատերազմի ենթատեքստում։ Մենք դրան լուրջ չենք վերաբերում»,- «Առաջին լրատվական»-ի հետ զրույցում ասաց Հայաստանի եվրոպական կուսակցության նախագահ Տիգրան Խզմալյանը։ Նրա խոսքերով՝ Ռուսաստանը Հայաստանին հայտարարել է հիբրիդային պատերազմ, և այդ հրապարակումները պետք է նայել հենց այդ շրջանակներում։ «Պատերազմը սկսվում է ինֆորմացիոն պատերազմով։ Իսկ Քոչարյանը այս դեպքում գործակալ է, ազդեցության գործակալ, որի շուրջը պետք է հավաքվեն ռուսամետ, ռուսամոլ ուժերը։ Իսկ հենց Քոչարյանն է ընտրվել, որովհետև հենց նա է ամենահասկանալի կերպարը Պուտինի համար։ Այլ կերպ ասած՝ ռուսական կողմի համար խրտվիլակ է պետք, իսկ այս դեպքում Քոչարյանը կատարում է խրտվիլակի դեր»,- ասաց Խզմալյանը։
Մեր զրուցակցի խոսքերով՝ այս հիբրիդային պատերազմը տալիս է իր «արդյունքները»։ Այդ արդյունքներից մեկն էլ, ըստ Խզմալյանի, կարելի է համարել Հայաստանի վարչապետի Լեհաստան չմեկնելը։
Տիգրան Խզմալյանի խոսքերով՝ ստեղծված իրավիճակում հարկ չկա խոսել հակազդման գործողությունների մասին։ Այլ ընդամենը պետք է սեփական շահերից ելնելով, ազգային շահերը պահպանելով՝ հանգիստ աշխատել, հանգիստ գործել։ «Ոչ մի հակազդեցություն պետք չէ, պարզապես այն, ինչ բխում է մեր ազգային շահերից, մեկնաբանվում է որպես հակառուսական, դա այդպես չէ։ Ուկրաինան, Վրաստանը սովորական պաշտպանեցին իրենց եթերը, և դա համապատասխանում էր իրենց պետական շահին ու դրա մեծ ոչ մի հակառուսական բան չկար։ Դրա մեջ կար հակագաղութային ինչ-որ բան, բայց եթե Հայաստանում կամ այլ տեղ որոշ ուժեր գաղութային քաղաքականությունը նույնացնում են ռուսական պետական քաղաքականությանը, բայց դա այդպես չէ։ Մեր խնդիրը դա չէ»,- ասաց Խզմալյանը՝ միևնույն ժամանակ հավելելով, որ անհրաժեշտ է նաև կտրուկ սահմանափակել, արգելել ռուսական պետական հեռուստաընկերությունների ազատ եթերը Հայաստանում։ Այն կարող է մնալ կաբելային տիրույթում։ «Հայաստանում ռուսական հեռուստաալիքները պետք է արգելել միայն այն պատճառով, որ Ռուսաստանը Հայաստանին հիբրիդային պատերազմ է հայտարարել»,-ընդգծեց Խզմալյանը։
Երևանի մամուլի ակումբի նախագահ Բորիս Նավասարդյանն էլ, անդրադառնալով ռուսական հեռուստաալիքներով պռոքոչարյանական հրապարակումներին, ռեպորտաժներին, նկատեց, որ դրանցով Ռուսաստանը փորձ է անում ճնշել Հայաստանին նաև հոգեբանական ոլորտում, որպեսզի Հայաստանի իշխանությունները հնարավորինս շատ, տարբեր հարցերում գնան զիջումների։ «Ցավոք, մենք տեսնում ենք, որ դա աշխատում է։ Ռուսաստանում էլ տեսնում են, որ դա աշխատում է, ստացվում է իրենց մոտ, դրա համար էլ ուժեղացնում են այդ ճնշումը հնարավոր բոլոր ուղղություններով, այդ թվում նաև օգտագործելով լրատվամիջոցները, որպեսզի Հայաստանն ավելի հնազանդ գործընկեր լինի Ռուսաստանի համար»,- «Առաջին լրատվական»-ի հետ զրույցում ասաց Նավասարդյանը՝ հավելելով, որ, միևնույն ժամանակ, այնպես էլ չէ, որ բոլոր այդ նյութերի պատվերները տրվում են Կրեմլից։ Ռուսական լրատվամիջոցներին շատ հազվադեպ է հրահանգ տրվում։ Նրանք շատ լավ հասկանում են, թե քամին որտեղից է փչում և որ ուղղությամբ, դրա համար էլ աշխատում են այդ քամու ուղղությամբ որոշակի գործողություններ անել։ «Մենք շատ լավ հասկանում ենք, որ և՛ Հայաստանում, և՛ Ռուսաստանում կան շատ լուրջ շրջանակներ՝ մեծ հնարավորություն ունեցող, որոնք կցանկանային Քոչարյանի գործով էլ ճնշումներ գործադրել Հայաստանի վրա, Հայաստանի դատական ու քննչական մարմինների վրա։ Այստեղ համատեղվում է Ռուսաստանի հստակ քաղաքականությունը Հայաստանի նկատմամբ և Հայաստանում այն մարդկանց շահերը, որոնք համարում են, որ իրենք պետք է պատմություն շուռ տան»,- ընդգծեց Նավասարդյանը։
Անդրադառնալով հարցին, թե ինչ հակազդող, պատասխան քայլեր են հարկավոր նման գործողություններին, մեր զրուցակիցը նկատեց, որ այդ քայլերը պետք է քաղաքական մակարդակով կատարվեն, և պաշտպանվելու համար Հայաստանը պետք է ցույց տա և ապացուցի, որ այդ հոգեբանական ճնշումներին ուշադրություն չի դարձնում, որ այդ հոգեբանական ճնշումները չեն կարող ազդել մեր քաղաքական վարքագծի վրա, որ այդ ճնշումների պատճառով մենք չենք կարող չգնալ մի միջազգային միջոցառման, որտեղ մեր ներկայությունը խիստ ցանկալի էր։ «Որքան մենք գնանք զիջումների, այնքան մենք կարող ենք ասել, որ ճնշման ուժգնությունը մեծանալու է»,- եզրափակեց Բորիս Նավասարդյանը։
