Սեպտեմբերի 1-ը նշվում է որպես Գիտելիքի և դպրության օր։ Այս տարի այդ օրը համընկավ հանգստյան օրերի հետ, և տարբեր կողմերից քննադատություն հնչեց առ այն, որ 38 հազար ուսուցիչ ոչ աշխատանքային օրով կանչվել է աշխատանքի, բայց նրանք դրա համար չեն վճարվելու։
«Իրականում սեպտեմբերի 1-ը Գիտելիքի օր է, և բոլորս էլ գիտենք, որ այդ օրը որևիցե դասապրոցես չի լինում, այդ օրը տոնական օր է։ Իրականում, որքան էլ կային քննադատություններ, այդքան էլ նույն ուսուցիչների կողմից կային պնդումներ, որ սա Գիտելիքի տոն է, և մենք պարտավոր ենք մեր նոր աշակերտներին ընդունել դպրոց»,- «Առաջին լրատվական»-ի հետ զրույցում ասաց ՀՀ կրթության, գիտության, մշակույթի և սպորտի նախարարի տեղակալ Լուսինե Առաքելյանը։
Կրթության տարբեր փորձագետներ, տարբեր կրթական հաստատությունների ղեկավարներ փաստում են, որ կրթության բարեփոխումների հետ կապված շատ գործընթացներ տեղի են ունենում փակ դռների հետևում․ չկա հանրային քննարկում, և որ իրենք ներգրավված չեն այդ քննարկումներին։ Ինչպե՞ս կարձագանքեք այս քննադատություններին․ «Առաջին լրատվական»-ի հարցին ԿԳՄՍ փոխնախարարը պատասխանեց․ «Ես այդ քննադատության մեջ և՛ օբյեկտիվ, և՛ սուբյեկտիվ տարր տեսնում եմ, հիմնականում՝ սուբյեկտիվ։ Օրինակ՝ համընդհանուր ներառական կրթության անցնելու ժամանակ ոչ միայն մանկավարժներ էին ներառվել այդ աշխատանքային խմբի մեջ, այլ նաև հասարակական կազմակերպություններ և, բնականաբար, բոլոր ուսուցիչները կամ նույնիսկ տնօրենները չէին կարող ներգրավվել այդ քննարկմանը։ Այս առումով ես այնքան էլ համաձայն չեմ իրենց հետ։ Ճիշտ է՝ նրանք բոլորը ներգրավված չէին քննարկմանը, բայց միանշանակ այդ քննարկումները դրվելու են հանրային քննարկման․ որևէ նորմատիվային ակտ առանց հանրային քննարկման չի ընդունվելու։ Մենք առցանց հետևում ենք և՛ առաջարկություններին, և՛ քննադատություններին, որոնք ընդունում ենք ի գիտություն և շատ դեպքերում նաև հաշվի ենք առնում»։
Մանրամասները՝ տեսանյութում։