Կառավարության ամենաերիտասարդ ղեկավարը շենքում նման տրանսպորտային միջոցի օգտագործումը բացատրել է երկար միջանցքներով:
Ուկրաինայի նոր վարչապետ Ալեքսեյ Գոնչարուկը որոշել է երիտասարդ լսարանին մասնակից դարձնել քաղաքականությանը և Գիտելիքի օրվա առթիվ դպրոցականներին և ուսանողներին ուղղված տեսաուղերձ է ձայնագրել: Նա իր լսարանին ցույց է տվել կառավարության շենքի տարածքը՝ շրջելով էլէկտրական ինքնագլորով:
«Բարև ընկերներ: Այսօր սեպտեմբերի 1-ն է, Գիտելիքի օրը: Վաղը դուք դպրոց կգնաք… Իսկ ես կգնամ աշխատանքի Ուկրաինայի կառավարություն, որտեղ ես վարչապետ եմ աշխատում»,- ասել է Գոնչարուկը:
Վարչապետը խոստացել է, որ կառավարությունն ամեն ինչ անելու է, որպեսզի ստեղծի այնպիսի պայմաններ, որտեղ երիտասարդները կլինեն խելացի, կրթված և ազատ:
Գոնչարուկն ընդամենը 35 տարեկան է. նա երկրի պատմության մեջ ամենաերիտասարդ վարչապետն է: Ուկրաինայի Գերագույն ռադան հաստատել է նրա թեկնածությունը մի քանի օր առաջ: Դրանից առաջ նա եղել է նախագահ Վլադիմիր Զելենսկիի գրասենյակի ղեկավարի տեղակալը: