«Սա պուտինյան ռեժիմի հոգեվարքի հերթական դրսևորումն է։ Ես ուշադիր հետևում եմ ռուսական հեռուստաալիքներին՝ Զելենսկու ընտրությունների ժամանակ ռուս պրոպագանդիստները բողազները ճղում էին, որ Պորոշենկոն հանցագործ է, փողեր է գողացել, հարստացել ու նրան պետք է դատել։ Հիմա դրանից հազար անգամ ավելի շատ մեր բերդում նստած հանցագործն է արել, նրան ինչո՞ւ եք պաշտպանում»,-«Առաջին լրատվական»-ի հետ զրույցում անդրադառնալով ռուսական հեռուստաալիքների հերթական անդրադարձին Քոչարյանի գործին, ասաց քաղաքագետ Արկադի Վարդանյանը։
Մեր զրուցակիցն ընդգծեց. «Հայաստանում տեղի ունեցած ժողովրդավարական հեղափոխությունը իրենց ձեռք չի տալիս, Հայաստանը պոկվում է իրենց ազդեցության լծակից, ու իրենք վերջիվերջո մենակ են մնալու՝ իրենց բոլշևիզմով, նեոբոլշևիզմով ու արտաքին այսպիսի քաղաքականությամբ»։
Արկադի Վարդանյանը հավանական է համարում նաև այն տարբերակը, որ Վլադիմիր Պուտինն ընդհանրապես Հայաստան չգա. «Որքան ես հասկանում եմ՝ նրանք նույնիսկ շանտաժի են դիմել, ասել են՝ եթե մինչև Պուտինի այցը Քոչարյանը ազատության մեջ չլինի, նա ընդհանրապես չի գա։
Մենք էլ իրեն երևի շատ էինք կարոտել, մեզ բոլորովին պետք չէ, որ Վլադիմիր Վլադիմիրովիչ կոչվածը գա, այնպես չէ, որ ուրախ, զվարթ իրենք ենք սպասում»։
Ըստ Վարդանյանի՝ Հայաստանը պետք է վերանայի նաև ԵԱՏՄ իր անդամակցությունը, նմանատիպ միջոցառումներին մասնակցությունը. «Սուտ կառույց է, Ռուսաստանի կազմակերպած այն սին կառույցներից, որը նպատակ ուներ ամեն ձևով վերականգնել Խորհրդային միությունը։ Կեղծ կառույց է, որի համար միայն փող էինք ծախսում։ Ես լինեի՝ Հայաստանը ԵԱՏՄ-ից դուրս կբերեի, ռուսական ռազմաբազան էլ այստեղից դուրս կվռնդեի՝ ինչպես այն ժամանակ արեց Միխեիլ Սաակաշվիլին»։
Քաղաքագետի դիտարկմամբ՝ հայ ժողովրդի սպասումները հեղափոխությունից այլ են։ «Ոչ թե այսպես նեյնիմ-նեյնիմ անել, բռնել բաց թողել, Սերժիկին կբռնեն, թե ոչ. սա նմանեցվում է ավելի շատ մանկական խաղերի, քան լուրջ քաղաքականության»,- եզրափակեց նա։