Տարիներ շարունակ մեզանում խոսվում է այն մասին, որ սերիալներում տեղ գտած բռնության տեսարաններն ազդում են հասարակական, հատկապես երեխաների տրամադրության և առհասարակ կերպի վրա: Հեռուստատեսության և ազգային ռադիոյի հանձնաժողովն ինչպե՞ս է պատրաստվում պայքարել այս ամենի դեմ: «Առաջին լրատվական»-ի հետ զրույցում, անդրադառնալով այս հարցին, Հեռուստատեսության և ազգային ռադիոյի հանձնաժողովի նախագահ Տիգրան Հակոբյանը ներկայացրեց իր դիտարկումները՝ մասնավորապես ընդգծելով. «Ցավոք կա հանրային պահանջ՝ հանրության մեջ կա մի շերտ, որը սիրում է դիտել այդպիսի տեսարաններով սերիալներ, իսկ կոմերցիոն հեռուստատեսություններն առաջնորդվում են իրենց շահով: Հեռուստատեսությունները կարող են արդարանալ, որ դրանցում արտացոլվում է կյանքը:
Պետության դերը պետք է լինի մատ թափ տալը և ասելը՝ չի՛ կարելի: Կան չափանիշներ, որոնցից ներքև իջնել չի կարելի: Մեր պետության շահերից ելնելով՝ պետք է նվազեցնենք այդ բովանդակության հեռարձակումը»: Տիգրան Հակոբյանի կարծիքով՝ պետությունը պետք է աջակցի ավանդական մեդիաներին՝ նպաստելով նորմալ բովանդակության ստեղծմանն ու հեռարձակմանը»:
Տիգրան Հակոբյանը նաև ընդգծեց, որ օրենսդրական կարգավորումից հետո, իր կարծիքով, օտար հեռարձակողները չպետք է լինեն հանրապետական տարածում ունեցող մուլտիպլեքսում, նրանք կարող են լինել մալուխային ցանցերում, մասնավոր մուլտիպլեքսում. «Սակայն ընդհանրապես արգելել չի լինի: Մենք պետք է համակերպվենք, որ այս գլոբալ աշխարհում օտար հեռարձակողների առջև դռները չենք կարող փակել, նրանք պետք է հարթակներ ունենան: Երկրորդ լուծումը քաղաքական երկխոսությունն է գործընկերների հետ, ես այդպիսի խոսակցություն ունեցա Մոսկվայում, արտահայտեցի տեսակետ, որ մենք պետք է փորձենք հակահայկական կոնտենտը նվազագույնի հասցնել Ռուսաստանում և հակառուսական կոնտենտը՝ Հայաստանում… Պետք է բացատրել ռուսական կողմին, որ հատկապես պետական ֆինանսավորում ստացող ալիքներում ցանկացած հակահայկական դրսևորումը կարող է համարվել որպես Կրեմլի՝ պետության տեսակետ»:
«Չպետք է չափավորից վախենալ, բայց երբ օտար հեռարձակողը ինչ-որ սխալ բան է անում, պետք է հասկացել, որ սխալ են, և եթե այնպիսի բան են անում, որն օրենքն արգելում է՝ ազգային խտրականության քարոզում և այլն, կարող ես պատժել և կրկնության դեպքում դիմել դատարան»- նշեց մեր զրուցակիցը:
Մանրամասն՝ տեսանյութում: