ՀՀ վարչապետ Նիկոլ Փաշինյանը տեսակոնֆերանս է անցկացրել ԷԼԱՐԴ միջազգային խորհրդատվական ընկերության փորձագետների հետ, որի ընթացքում քննարկվել են Ամուլսարի հանքի վերաբերյալ իրականացված միջազգային փորձաքննության եզրակացության և դրա վերլուծության արդյունքները: Թեմայի շուրջ «Առաջին լրատվական»-ը հյուրընկալել է լրագրող Թեհմինե Ենոքյանին և «Քաղաքացու որոշում» կուսակցության գործադիր մարմնի անդամ Միքայել Նահապետյանին:
«ԷԼԱՐԴ-ի փորձագետները վերահաստատեցին այն ամենը, ինչ մենք գրեթե երկու շաբաթ է՝ բղավում ենք, այն է՝ ամբողջ տվյալները թերի են, և դրանց հիման վրա հնարավոր չէ եզրակացության հանգել»,- նշեց Թեհմինե Ենոքյանը՝ միաժամանակ ողջունելով տեսակոնֆերանսի կազմակերպումը:
Մեր զրուցակցի խոսքով՝ «Լիդիանը» նոր ՇՄԱԳ չի ուզում անել, որովհետև գիտեն՝ չեն հաղթահարի հանրային լսումների փուլը և պետք է տվյալները համալրեն. «Իսկ այդ դեպքում հնարավոր չէ ֆիքսել, որ ռիսկերը կառավարելի են»:
Թեհմինե Ենոքյանը ամենակարևոր հարցերից մեկը համարում է այն, թե ինչպես է ստացվել, որ Քննչական կոմիտեում ԷԼԱՐԴ-ի թերի տվյալները չեն նկատել. «Պարոն Իվանյանը վստահեցնում է, որ ինքն անաչառ քննություն է արել: Սակայն ես նրա անաչառությանը վաղուց եմ կասկածել՝ դեռ չիմանալով նրա և բնապահպանության նախկին նախարարի միջև ազգակցական կապի մասին»:
Միքայել Նահապետյանն էլ երեկվա տեսակոնֆերանսից այն հետևությանն է հանգել, որ մենք չունենք հանրային կառավարման համակարգ: Նրա խոսքով՝ այդ հանրային կառավարման համակարգը երկու շաբաթ չտեսնելու էր տալիս այն ռիսկերը, որ տեսնում էին քաղաքացիները:
«Եթե մենք մտածենք, որ այս ամենը լավ բեմադրված շոու է, ապա քաղաքական պատասխանատվության բոլոր սլաքներն ուղղվում են դեպի վարչապետը: Սակայն այդ սլաքները վարչապետի վրայից չի թեքում նաև մյուս տարբերակը, որովհետև այդ ամբողջ կառավարման համակարգի պատասխանատվությունը անձամբ իր վրա է՝ այդ մարդիկ իր ենթականերն են, այդ մարդկանց ինքն է ընտրել»,- ընդգծեց Միքայել Նահապետյանը:
Հարցազրույցն ամբողջությամբ՝ տեսանյութում:
