«Առաջին լրատվական»-ի տեղեկություններով՝ առաջիկա օրերին պաշտոնանկություններ են սպասվում ՀՀ քննչական կոմիտեում։ Պաշտոնանկությունները կապված են հենց Ամուլսարի հետ։ Մեզ հասած տեղեկություններով՝ պաշտոնանկների ցանկում է լինելու Ամուլսարի վերաբերյալ քննչական խմբի ղեկավար Յուրա Իվանյանը։ Այս պահին քննարկվում է նաև Քննչական կոմիտեի ղեկավար Հայկ Գրիգորյանի պաշտոնանկության հարցը։ Չի բացառվում, որ Ամուլսարի հարցով պատժվեն նաև նախկին պաշտոնյաներ։
Հիշեցնենք, որ երեկ Կառավարությունում կառավարության, փորձագետների, ԱԺ պատգամավորների մասնակցությամբ միջազգային փորձաքննություն իրականացրած ԷԼԱՐԴ ընկերության հետ տեսակոնֆերանս էր կազմակերպվել, որից անմիջապես հետո վարչապետը գրառում էր կատարել, որ մտածելու շատ բան կա, և Skype-կոնֆերանսի ընթացքում ի հայտ են եկել մի շարք նոր հանգամանքներ, որոնք քննության և գնահատման կարիք ունեն։
Բացի դրանից, երեկ հայտնի դարձավ նաև ՔԿ պաշտոնյա Յուրա Իվանյանի ու բնապահպանության նախկին նախարար Արամայիս Գրիգորյանի ազգակցական կապի ու առկա շահերի բախման մասին, որն ակնհայտորեն թաքցվել էր նաև վարչապետից։
Ակնհայտ է, որ փորձ է արվել վարչապետ Նիկոլ Փաշինյանին մոլորեցնել, և վերջինս Ամուլսարի հարցով նախնական որոշում կայացնելիս մոլորության մեջ է եղել։ Եվ հիմա, մեր տեղեկություններով, վարչապետը որոշել է պատժել որոշ պաշտոնյաների իրեն մոլորեցնելու և իր մեջքի հետևում նախկին պաշտոնյաների հետ գործարքների մեջ մտնելու համար։
Վարչապետին զայրացրել է նաև այն փաստը, որ Քննչական կոմիտեի նախագահ Հայկ Գրիգորյանն առանց խորամուխ լինելու կոնկրետ հանգամանքների մեջ, կառավարության նախորդ նիստին զեկուցելով վարչապետին ԷԼԱՐԴ-ի փորձաքննության արդյունքները՝ նշել էր, որ ամենակարևոր 3 կետերը, որոնց եզրակացության վերլուծությունը թույլ է տալիս հանգել դրան, հետևյալն են.
1. Ամուլսարի ստորգետնյա ջրերի և Ջերմուկի տերմալ աղբյուրների միջև որևէ կապ չկա:
2. Ամուլսարի ստորգետնյա ջրերի և Սևանի ավազանի միջև որևէ կապ չկա: Սակայն երկրաշարժի պարագայում հնարավոր է թթվային դրենաժի ինչ-որ կոնցենտրացիայի ներթափանցում Սպանդարյան-Կեչուտ ջրամբարի միջոցով Սևանա լճի ավազան, բայց այդ կոնցենտրացիայի համակցությունը Սևանա լճի ավազանի ծավալներում աննշան կլինի:
3. Ամենակարևոր հանգամանքը՝ Ամուլսարի ստորգետնյա ջրերի ազդեցությունն է Դարբ, Որոտան, Արփա գետերի վրա, որը հնարավոր է լինի, սակայն եթե «Լիդիան» ՓԲԸ-ն ձեռնարկի փորձագիտական խմբի կողմից ներկայացվող, առաջարկվող 16 մեղմման միջոց, այդ ռիսկերը կառավարելի կլինեն:
Եվ հիմնվելով այս ամենի վրա՝ Գրիգորյանը հայտարարել էր, որ քրեական հետապնդումը պետք է դադարեցվի։
Իսկ երեկ փաստացի ԷԼԱՐԴ ընկերության ներկայացուցիչը փաստեց, որ «Լիդիանի» 2016թ. ՇՄԱԳ-ը և նախագիծը բավարար չեն Ամուլսարի հանքն ապահով շահագործելու համար։
Պատահական չէ, որ երեկ կառավարությունում տեղի ուենցած Skype-կոնֆերանսի ընթացքում Հայկ Գրիգորյանն ու Յուրա Իվանյանը բավական անհանգիստ, ցայտնոտային վիճակում էին։