Սփյուռքը շատ կարևոր դերակատարություն ունի Հայաստանի զարգացման հարցում: Սփյուռքը ոչ միայն աշխարհով մեկ սփռված տարբեր գաղթօջախներն են և հայկական համայնքները, այլ նաև հսկայական ռեսուրս: «Առաջին լրատվական»-ի հետ զրույցում Բելգիայում բնակվող երգահան Արեգ Նազարյանը, անդրադառնալով հարցին, թե արդյոք համաձայն է վարչապետի այն տեսակետի հետ, թե Հայաստան -Սփյուռք հարաբերությունները նոր փուլ են մտել, նշեց. «Հույս ունեմ, որ այդպես է: Երբ խոսքը Սփյուռքի մասին է, պետք է հաշվի առնել, որ այն բազմաշերտ է: Բելգիական սփյուռքի հայկական կազմակերպություններում կա կարծիք, որ նախկին կառավարության ժամանակ Սփյուռքի նախարարության ներկայացուցիչների հետ հանդիպումները ֆորմալ բնույթ էին կրում, հուսամ՝ այժմ կապերն ավելի կամրապնդվեն ու կխորանան»: Ա. Նազարյանի խոսքով՝ Բելգիայում Սփյուռքի կազմակերպություններն այնքան էլ ակտիվ չեն, բայց գործում են խմբակներ, ինչը հայապահպանության համար շատ լավ է:
«Ես չեմ փախել Հայաստանից, Բելգիայում բնակվում եմ, ինչպես հյուրանոցում, որտեղ մի օր հաշիվը պետք է փակես ու հեռանաս, իսկ Հայաստանում ապրում եմ»,-ընդգծեց երգահանը՝ հավելելով, որ հայ լինելը դժվար է, բայց հետաքրքիր. «Պետք է նախ ճանաչես ինքդ քեզ, ընդունես այնպիսին, ինչպիսին կաս, սիրես և աշխատես, որ պրոգրես լինի: Այդ աշխատանքը պետք է լինի և՛ անհատի մակարդակով, և՛ կրթական»:
Երգահանի դիտարկմամբ՝ արվեստն ասեղնաբուժության նման մի բան է, այն պետք է ազդի ցանկացած մարմնի վրա՝ լինի սևամորթ թե սպիտակամորթ, աթեիստ թե հավատացյալ:
«Արվեստը պիտի կարողանա դիպչել մարդու սրտին՝ լինի նա ակադեմիկոս թե տաքսու վարորդ: Ես արվեստում էլիտիզմը չեմ սիրում»,- նշեց Արեգ Նազարյանը՝ հրավիրելով ամռան վերջին օրն իր մասնակցությամբ ՆՓԱԿ-ում կայանալիք «Խաչմերուկներ» համերգ-ներկայացմանը:
Մանրամասն՝ տեսանյութում:
