Ռուսաստանի նախագահ Վլադիմիր Պուտինը հայտարարել է, որ իր թուրք գործընկեր Ռեջեփ Թայիփ Էրդողանի հետ քննարկել է Սու-35 կործանիչի վերաբերյալ համագործակցության հնարավորությունը՝ գրում է ria.ru-ն:
«Խոսքը ոչ միայն ռազմական համագործակցության կամ ռազմատեխնիկական ոլորտում համագործակցության, այլ նաև քաղաքացիական ոլորտներում, տիեզերքում և ավիացիայի բնագավառում համագործակցության մասին էր», – ասել է Ռուսաստանի ղեկավարը ռուս-թուրքական բանակցություններին հաջորդած մամուլի ասուլիսում:
«Մենք շատ հնարավորություններ ունենք, մենք ցուցադրեցինք զենքի և ռադիոէլեկտրոնային պայքարի նոր համակարգեր», – ասել է Պուտինը՝ հավելելով, որ Էրդողանին դուր է եկել ուղղաթիռի տեխնոլոգիան՝ ներառյալ Մի-38-ը: Սրանք թեթև ուղղաթիռներ են, որոնք նույնպես օգտագործվում են բժշկական նպատակներով:
«Պրն. նախագահը մտադիր է իրականացնել Թուրքիայում օդային շտապօգնության զարգացման մի ամբողջ ծրագիր: Մենք նույնպես ունենք այդպիսի ծրագրեր Ռուսաստանի օրակարգում», – պարզաբանել է Պուտինը:
Ըստ նրա՝ թուրք գործընկերների համար մեծ հետաքրքրություն է ներկայացրել համատեղ արտադրության հեռանկարը:
«Ի դեպ, մենք պատրաստ ենք դրան, և որոշակի ոլորտներում այժմ մենք ակտիվորեն կքննարկենք դա գործընկերների հետ», – ասել է Պուտինը: