Երբ Իրանի արտգործնախարար Ջավադ Զարիֆը օգոստոսի 25-ի ցերեկը վայրէջք կատարեց Բիարիցում, թվում էր, որ Ֆրանսիայի նախագահ Էմանուել Մակրոնին հաջողվել է խորամանկ հնարքը՝ ամերիկացի գործընկեր Դոնալդ Թրամփի նկատմամբ, հայտնում է CNN-ը:
Նշվում է, որ շաբաթներ շարունակ Մակրոնը փորձել է համոզել Թրամփին մեղմել Թեհրանի նկատմամբ դիրքորոշումը, ինչին ի պատասխան ԱՄՆ նախագահը հայտարարել է, որ չի կասկածում նրա բարի մտադրություններին, բայց ոչ ոք «չի խոսի Միացյալ Նահանգների անունից», բացի իրենցից: Իրանի հետ միջուկային համաձայնագրից Վաշինգթոնի միակողմանի դուրս գալուց հետո Թրամփը մեծացրեց ճնշումը երկրի վրա: Միևնույն ժամանակ, Իրանը լցանավեր ձերբակալեց Հորմուզի նեղուցում: Այսպիսով, կարևոր ջրային ուղին վերածվեց լարվածության թեժ կետի, որտեղ ցանկացած սխալ քայլ կարող էր տարածաշրջանային պատերազմ հրահրել:
Ընդգծվում է, որ գագաթնաժողովի ընթացքում G7-ի առաջնորդներից հակասական ազդանշաններ են ստացվել, ինչը վկայում էր քննարկումների ինտենսիվության մասին: Մակրոնը հայտարարել է, որ կողմերը պայմանավորվել են իրանական կողմի նկատմամբ գործողությունների համատեղ ծրագրի շուրջ՝ հաշվի առնելով տարբեր տեսակետները: Սակայն, Թրամփի հայտարարություններից հետո Ֆրանսիայի նախագահը ստիպված եղավ պարզաբանել, որ նա խոսում է միայն իր երկրի անունից, չնայած որ դա անում է տեղի ունեցած քննարկումների արդյունքում: Պարզաբանող հարցին նա պատասխանել է, որ G7-ի մասնակիցներից յուրաքանչյուրը գործելու է առանձին: Զարիֆի հրավերի նպատակը մնաց անհայտ:
