Բեռլինի կենտրոնում Վրաստանի քաղաքացի Զելիմխան Խանգոշվիլիի սպանությունը, ամենայն հավանականությամբ, պատվիրվել է արտասահմանյան հետախուզական ծառայությունների կողմից: Այդ մասին հայտնում է Der Spiegel ամսագիրը:
Հետաքննությունը կարծում է, որ Խանգոշվիլին կարող էր սպանվել իր մասնագիտական գործունեության պատճառով: Մասնավորապես, այն փաստը, որ Խանգոշվիլին նախկինում աշխատել է Վրաստանի ՆԳՆ հակաահաբեկչական բաժանմունքում և 2012-ին մասնակցել է Լոպոտայի կիրճում Դաղստանի իսլամիստների դեմ ռազմական գործողությանը, խոսում է այս վարկածի օգտին: Նախկինում սպանության փորձից հետո Խանգոշվիլին մեկնել էր Ուկրաինա, որտեղ համագործակցում էր տեղական հատուկ ծառայությունների հետ և «շարունակում պայքարել Մոսկվայի ազդեցության դեմ»,- նշում է Der Spiegel-ը: Երկրորդ մահափորձից հետո նա տեղափոխվել էր Գերմանիա:
Նաև, ըստ Der Spiegel-ի, Խանգոշվիլիի սպանության մեջ կասկածվող Ռուսաստանի 49-ամյա քաղաքացին ժամանել է Գերմանիա հանցագործությունից քիչ առաջ և քայլեր է ձեռնարկել երկրից արագ հեռանալու ուղղությամբ:
Զելիմխան Խանգոշվիլին սպանվել է օգոստոսի 23-ին բեռլինյան պուրակներից մեկում։
