Լուրեր
Ամուլսարի հարցը լուրջ ճգնաժամի աղբյուր է դառնալու. ունենք հեղափոխություն իրականացրած ուժերի հակադրություն, որը նոր իրավիճակ է
  • 13:00
  • 2019-08-26
  • Դիտումներ՝ *

«Վարչապետի այցը Ջերմուկ ինչ-որ իմաստով պարտադրված էր։ Հանրային որոշակի ճնշման արդյունքում որոշում կայացվեց այցելել Ջերմուկ։ Այցից ստացված տպավորությունները վարչապետի վերջնական որոշման վրա կարող էին ազդեցություն ունենալ, եթե այցն անկեղծորեն կազմակերպված լիներ։ Իսկ եթե արդեն քաղաքական որոշում կա հանքը շահագործելու, ապա չեմ կարծում, որ այցի ժամանակ ստացած տպավորությունները կարող են ազդել վերջնական որոշման վրա»,- «Առաջին լրատվական»-ի «Մամուլի հետ սուրճ» հաղորդման շրջանակներում ասաց «Ինֆոքոմ» կայքի խմբագիր Սևակ Մամյանը։

Նրա խոսքով՝ ակնհայտ է, որ կառավարող ուժն ունի արդեն կայացրած քաղաքական որոշում։ Դրա մասին են վկայում տեղեկատվական հոսքերը, Ամուլսարի թեման շեղելու համար տարբեր այլ թեմաներ շրջանառության մեջ դնելը՝ մասնավորապես Տավուշում դիրքերի թեման, Արարատ Միրզոյանի գրառումը Չինարիի մասին և այլն։

Սևակ Մամյանի համար տարօրինակ և խնդրահարույց է, որ առ այսօր ԱԺ հատկապես իշխող խմբակցության կեսը կարծիք չի հայտնել Ամուլսարի շահագործման թեմայով, քանի որ որքան էլ սլաքները ուղղվեն կառավարության, վարչապետի կողմը, ամեն դեպքում Հայաստանը խորհրդարանական երկիր է, և որոշում կայացնողը խորհրդարանն է։

Սևակ Մամյանի խոսքով՝ երկու ելք կա. կա՛մ հանքը չի շահագործվում, և բոլորը հանդարտվում են, կա՛մ կառավարությունը որոշում է կայացնում հանքը շահագործելու, և դա լուրջ դիմադրություն է առաջացնում. «Կարծում եմ՝ սա լուրջ ճգնաժամի աղբյուր է դառնալու, ավելին՝ եթե կառավարությունը գնա ուժային լուծման»:

Սևակ Մամյանի կարծիքով՝ եթե կառավարությունը որոշի արգելել հանքի շահագործումը, ապա կառավարության, վարչապետի վարկանիշը կբարձրանա ավելի, քան եղել է հեղափոխության ժամանակ։ Հակառակ դեպքում պատկերացնել կարելի է, թե ինչ կլինի. «Ներկա իշխող ուժի հենարանը ժողովրդի վստահությունն է։ Այս պահին կա այդ վստահությունը բարձրացնելու լուրջ շանս, և հակառակը»։

Առավել մանրամասն՝ տեսանյութում:

  • Դիտումներ՝ *