ՀՀ նախագահ Արմեն Սարգսյանն իր հրամանագրով ուժը կորցրած է ճանաչել Վաղարշակ Հարությունյանին զինվորական կոչումից զրկելու հրամանագիրը:
«Հիմք ընդունելով վարչապետի առաջարկությունը՝ համաձայն Սահմանադրության 139-րդ հոդվածի 1-ին մասի՝ ուժը կորցրած ճանաչել Հայաստանի Հանրապետության նախագահի 2002 թվականի հուլիսի 22-ի «Վ. Վ. Հարությունյանին զինվորական կոչումից զրկելու մասին» ՆՀ-1135-Ա հրամանագիրը»,-ասված է ՀՀ նախագահի հրամանագրում:
Հիշեցնենք, որ Վաղարշակ Հարությունյանը 2002-ին Քոչարյանի հրամանագրով զրկվել է գեներալ-լեյտենանտի զինվորական կոչումից, իսկ 2004-ի ապրիլին 12-ի իրադարձություններից հետո ազատազրկվել է՝ սահմանադրական կարգը տապալելու փորձ անելու մեղադրանքով։
Նախկին դատավոր Պարգև Օհանյանը, որ 2007 թվականի աշնանը Ռոբերտ Քոչարյանի հրամանագրով զրկվեց դատավորի լիազորություններից, դրական է գնահատում իշխանության այս քայլը, նշում, որ սա անցումային արդարադատության դրսևորում է, բայց, ոչ թե ընտրովի որոշում պետք է կայացնել, պետք է հանձնաժողովներ ստեղծվեն, պետք է ուսումնասիրեն նախկին իշխանությունների կատարած իրավունքի խախտումները, դրանց հիման վրա վարչապետը միջորդի նախագահին կամ մտնեն դատարան՝ որպես ի հայտ եկած նոր հանգամանք։
«Այս մասին նախկինում շատ խոսվեց, հիմա լռություն է»,-ասաց Պարգև Օհանյանը։
Հիշեցնենք, որ «Ռոյալ Արմենիա» ընկերության ղեկավարների նկատմամբ արդարացման դատավճիռ կայացնելուց հետո Քոչարյանը նրան զրկել էր լիազորություններից:
Հեղափոխության առաջին օրերին Պարգև Օհանյանը դիմել է նախագահին իր լիազորությունները վերականգնելու համար, սակայն ընթացք չի տրվել դիմումին․ «Ես էլ հետևողական չեղա։ Եվ հիմա եթե վարչապետը նման կամք դրսևորի, ես չեմ կարծում, որ նախագահը կմերժի»,- «Առաջին լրատվական»-ի հետ զրույցում ասաց նախկին դատավորը։
Նա նշեց, որ իր լիազորությունների վերականգնման մասով առանձնապես մեծ հույսեր չունի, այլ հարց է, որ եթե վարչապետը նման կամք կդրսևորի, կմիջնորդի՝ ինչպես Վաղաշակ Հարությունյանի դեպքում, ինքը շատ զգացված կլինի և ինչպես միշտ՝ պատրաստ ծառայելու ՀՀ-ին։
