Միացյալ Նահանգների նախագահ Դոնալդ Թրամփն ասել է, որ «Մեծ յոթնյակի» անդամ երկրների առաջնորդներն արտահայտվել են ռուսական կողմի G7-ին միանալու թեմայի վերաբերյալ, հաղորդում է Reuters-ը:
Ինչպես նշել է Թրամփը, առաջնորդների թվում եղել են Ռուսաստանի գագաթնաժողովի բանակցություններին մասնակցելու կողմնակիցներ: Այնուամենայնիվ, նա շեշտել է, որ այս պահին երկրները այդ հարցով ընդհանուր հայտարարի չեն եկել:
«Այդ հարցի շուրջ բանավեճերը շարունակվում են»,- հավելել է Թրամփը:
Նա ասել է, որ ներկայումս աշխատանքներ են տարվում, որպեսզի Ռուսաստանը կարողանա միանալ գագաթնաժողովին: Ռուսական կողմի վերադարձը դրական բնույթ կկրի, նշել է Թրամփը:
Ավելի վաղ հաղորդվել է, որ Թրամփն ինքն է առաջարկել Ռուսաստանին հրավիրել գագաթնաժողովին մասնակցելու: Հայտնի է, որ շատ երկրներ տարբեր կերպ են արձագանքել նրա գաղափարին:
