Մայրաքաղաքում տեղացած կարկուտը կանխատեսված էր, Հայպետհիդրոմետ ծառայությունը հատուկ նախապես հանդես էր եկել մամլո ասուլիսով` այդ մասին հանրությանը տեղեկացնելու համար: «Առաջին լրատվական»-ի հետ զրույցում ԱԻՆ Հիդրոմետ ծառայության պետի տեղակալ Գագիկ Սուրենյանը նշեց, որ նախապես զգուշացրել էին` հզոր ցիկլոն է անցնում, սպասվում է ձյուն, կարկուտ, առատ տեղումներ, ցրտահարություն: «Սա, իհարկե, կարկուտ էր, պարզապես մարտ ամսին խոշոր կարկուտ չի տեղում, սրան ավելի շատ ասում են բանջարբուսուկ (խլորիկ): Այս եղանակին խոշոր կարկուտ չի լինում, այս կերպ է արտահայտվում»,- ասաց նա:
Սուրենյանը նշեց, որ նման տեղումներ էլի են եղել, անգամ ավելի ուժեղ կարկտահարություն կարող է լինել: Հիդրոմետ ծառայության ներկայացուցիչը նշեց, որ բերքի վնասումն անխուսափելի է. ծաղկած ծառերի վրա տեղացած նման կարկուտը չի կարող չվնասել բերքին:
«Ես դեռ տեղյակ չեմ` ինչ մասշտաբով է կարկուտ տեղացել Արարատյան դաշտավայրում. նոր կտրվեց, հիմա տեղեկատվությունը կստանանք, կպարզենք»,- ասաց նա:
