Սիրիայի քրդերը աջակցեցին Սիրիայի հյուսիսարևելյան հատվածում բուֆերային գոտի ստեղծելու Միացյալ Նահանգների և Թուրքիայի ծրագրերին: Շաբաթ օրը՝ օգոստոսի 24-ին, հայտարարել է Սիրիայի դեմոկրատական ուժերի (SDF) առաջնորդ Մասլում Կոբանին՝ նշելով, որ իր կազմակերպությունը կցանկանա «դրական դեր» խաղալ անվտանգության գոտի ստեղծելու գործընթացում:
Փաստացի բուֆերային գոտին արդեն սկսել է աշխատանքը. Թուրքիան և Միացյալ Նահանգները կոորդինացիոն կետ են ստեղծել Թուրքիայի Շանլիուրֆա մարզում, այժմ երկու երկրների զինված ուժերը ուղղաթիռներով համատեղ թռիչքներ են իրականացնում տարածքի շուրջ, օգոստոսի 24-ին ասել է Թուրքիայի պաշտպանության նախարար Հուլուսի Աքարը:
Օգոստոսի սկզբին ԱՄՆ-ն ու Թուրքիան հայտարարեցին Թուրքիայի սահմանի և Քրդական ազգային ինքնապաշտպանության ջոկատի դաշինքի միջև բուֆերային գոտի ստեղծելու մասին:
ԱՄՆ նախագահ Դոնալդ Թրամփը առաջարկել է ստեղծել անվտանգության գոտի, որպեսզի Անկարան զերծ մնա դաշինքի հետ բախումներից:
Նախատեսվում է, որ բուֆերային գոտին կօգտագործեն նաև սիրիացի փախստականները՝ Թուրքիայից տուն վերադառնալու համար:
Ներկայում Թուրքիայում ավելի քան 3,5 միլիոն սիրիական փախստական կա, ավելի շատ, քան ցանկացած այլ երկրում:
Սիրիայի կառավարությունը կտրականապես մերժում է բուֆերային գոտի ստեղծելու գաղափարը և այն համարում է երկրի ինքնիշխանության խախտում: