Օրեր առաջ Հայաստանի ազգային հավաքականի կիսապաշտպան Արազ Օզբիլիսը երկկողմ համաձայնությամբ խզեց պայմանագիրը թուրքական «Բեշիքթաշ» ֆուտբոլային ակումբի հետ: Թուրքական ակումբը 29-ամյա ֆուտբոլիստին կվճարի 2,5 միլիոն եվրո՝ որպես փոխհատուցում։ Ըստ մամուլի հրապարակումների` Արազ Օզբիլիսով հետաքրքրվում է Հայաստանի Բարձրագույն խմբում հանդես եկող «Արարատ» ֆուտբոլային ակումբը: Օզբիլիսը չբացառելով, կարիերան Հայաստանում շարունակելու հնարավորությունը նշել էր, որ դեռ ժամանակ ունի տարբերակները քննարկելու և վերջնական որոշում կայացնելու համար: Իսկ թե ի՞նչ որոշում կկայացնի մեր հավաքականի ամենատաղանդավոր ֆուտբոլիստներից մեկն այս պահին դժվար է ասել: Ակնհայտ է մի բան: Օզբիլիսի չի կարողանա մեր հավաքականին օգնել սեպտեմբերի սկզբին կայանալիք Իտալիայի և Բոսնիայի հետ հանդիպումներին:
Մեր ֆուտբոլիստը չունի խաղային պրակտիկա և եթե նույնիսկ պայմանագիր կնքի որևէ ակումբի հետ չի հասցնի ֆունկցիոնալ առումով վերականգնվել մինչև կարևորագույն խաղերը: Ինչև, մոտ մոտ մեկ ամիս առաջ Արաս Օզբիլիսը վերադարձել էր Ստամբուլ և խոսվում էր, որ գալիք մրցաշրջանում նա կխաղա «Բեշիկթաշում»: Մեր ֆուտբոլիստը բուժզննում էր անցել թուրքական ակումբում և միացել ուսումնամարզական հավաքին:
Ըստ թուրքական լրատվամիջոցների՝ «Բեշիքթաշի» նորանշանակ գլխավոր մարզիչ Աբդուլա Ավչին հույսեր էր կապում հայ ֆուտբոլիստի հետ և մտադիր էր հնարավորություն տալ նրան: Ավելի վաղ Haberler պարբերականը գրել էր, որ Արաս Օզբիլիսը երկարաձգել է «Բեշիկթաշի» հետ պայմանագիրը։ Մասնավորապես, հայ ֆուտբոլիստը, որը 2016 թվականին էր 4 տարվա պայմանագիր կնքել «Բեշիկթաշի» հետ, մեկ տարով երկարաձգել է այն։ 29-ամյա ֆուտբոլիստի նախորդ պայմանագիրը նախատեսված է եղել մինչև 2020 թվականի մայիսի 31-ը, իսկ նոր պայմանագիրը՝ մինչև 2021 թվականի մայիս։ Այս տեղեկությունը շատերի համար ոչ միայն անակնկալ էր, այլև պարադոքսալ: Թուրքական ակումբում Արազ Օզբիլիսի տրանսֆերը համարվում էր ամենաանհաջողներից մեկը: «Բեշիկթաշն», ըստ էության, խաղալու հնարավորություն չէր տալիս մեր կիսապաշտպանին՝ շարունակ վարձավճարով տրամադրելով այլ թիմերին:
Օզբիլիսի վերջին ակումբը հոլանդական «Վիլլեմ-2»-ն էր, որտեղ հայ ֆուտբոլիստը վատ չէր խաղում, սակայն հայտնի միջադեպից հետո հեռացավ: Հոլանդիայի առաջնության 28-րդ տուրից հետո Օզբիլիսը տեղափոխվել էր «Վիլլեմ-2»-ի երկրորդ թիմ` «Ֆորտունա»-ի դեմ խաղի ժամանակ տեղի ունեցած միջադեպի պատճառով, երբ կիսապաշտպանը հրաժարվել էր փոխարինման դուրս գալ: Կողմերը հանգել էին այն եզրակացության, որ իրավիճակի միակ լուծումը պայմանագրի խզումն է: Թե ինչ է տեղի ունեցել Օզբիլիսի հետ ստամբուլյան թիմի ղեկավարության միջև հայտնի չէ:
Պայմանագիրը թարմացնելուց ընդամենը մի քանի ամիս անց այն խզելը ընդունենք որ անհասկանալի է և նույնիսկ տարօրինակ: Ավելին «Բեշիկթաշը» ստիպված է լինելու կլորիկ գումար վճարել Օզբիլիսին որպես փոխհատուցում: Մնում է հուսալ, որ առաջիկա ամիսներին Օզբիլիսը կսկսի խաղալ և Եվրոպայի առաջնության ընտրական փուլում կկարողանա օգնել Հայաստանի ազգային հավաքականին:
