Իրանի արտգործնախարար Մոհամադ Ջավադ Զարիֆը Նորվեգիա կատարած այցի ընթացքում ասել է, որ քանի դեռ ինքը ողջ է, «ոչ ոք չի համարձակվի իրանցիներից նույնիսկ Կասպից ծովի մեկ կաթիլ վերցնել»: Այս մասին հայտնում է իրանական IRNA լրատվական գործակալությունը:
Նախարարը նշել է, որ Իրանը պատերազմ ու պատժամիջոցներ վերապրած երկիր է, որին միաժամանակ անցած 40 տարիների ընթացքում ոչ մի օտար պետություն չի աջակցել: Իրանցիները խստորեն պաշտպանում են իրենց անկախությունն ու ամբողջականությունը, ուստի ոչ ոք չի համարձակվի պահանջել Իրանից հող և ծովային տարածք՝ ներառյալ Կասպից ծովի իրավասու մասը:
Խոսելով Իրանի քաղաքական անկախության մասին՝ Զարիֆը նշել է, որ «իրանցիներին խնամակալ պետք չէ միջազգային գործերում. նրանք կրթված են և ունակ են որոշումներ կայացնելու և ինքնուրույն գործելու»: