2010թ. երրորդ եռամսյակում միջին ամսական անվանական աշխատավարձի աճը, նախորդ տարվա երրորդ եռամսյակի համեմատ, ավելի քիչ է եղել` 6.4%, քան սպառողական գների աճի տեմպը` 8.7%: Այս մասին նշված է ԱՎԾ` օրերս հրապարակած «Պարենային ապահովություն և աղքատություն. 2010թ. հունվար-սեպտեմբեր» զեկույցում:
Այսինքն` իրական միջին աշխատավարձը 2010թ. երրորդ եռամսյակում նվազել է 2.3%-ով: Սա նշանակում է, որ նշված ժամանակահատվածում մեր ստացած աշխատավարձով միջինը 2.3%-ով ավելի քիչ ապրանքներ ու ծառայություններ կարող էինք գնել, քան 2009թ. նույն ժամանակահատվածում: Նշենք, որ 2009թ. ընթացքում ՀՀ-ում միջին աշխատավարձի աճը դեռևս շարունակում էր ավելի արագ աճել, քան գնաճը: Անվանական աշխատավարձի աճը սկսեց գնաճից հետ մնալ այս տարվա առաջին եռամսյակից սկսած: Մինչդեռ հենց անվանական աշխատավարձն է կազմում մեր բնակչության ողջ դրամական եկամուտների մեծ մասը` մոտ 55%-ը:
Աշխատավարձից բացի, դրամական եկամուտները ներառում են նաև կենսաթոշակները, նպաստները, տրանսֆերտները, գյուղմթերքի ու անասունների վաճառքից ստացած եկամուտները և այլն: 2010թ. դրամական եկամուտների վերաբերյալ տվյալներ ԱՎԾ-ն դեռ չի հրապարակել, սակայն նախորդ տարվա վերաբերյալ հրապարակած տվյալների համաձայն` 2009թ. մեր բնակչության դրամական եկամուտները ավելի քիչ են աճել, քան գնաճն է եղել: Այսպես, 2009թ. բնակչության մեկ շնչին ընկնող դրամական եկամուտները, ըստ ԱՎԾ-ի, կազմել են մոտ 28 հազար դրամ, որը 2008թ. համեմատ աճել է մոտ 4.3%-ով: Մինչդեռ այդ տարի տասներկուամսյա գնաճը կազմել է 6.5%: Ակնհայտ է, որ այս տարվա արդյունքներով ևս բնակչության դրամական եկամուտները ավելի քիչ են աճելու, քան գները: Եթե վերցնենք բնակչության դրամական եկամուտների մեջ մտնող հիմնական բաղադրիչները` աշխատավարձը և կենսաթոշակներն ու նպաստները, ապա կտեսնենք, որ դրանք գներից շատ ավելի քիչ են աճել: Այսպես, տասներկուամսյա գնաճը 2010թ. առաջին 10 ամիսներին կազմել է 9.1%, այն պարագայում, երբ միջին ամսական անվանական աշխատավարձը անցած 10 ամիսներին, ըստ ԱՎԾ-ի, աճել է 7.6%-ով: Կենսաթոշակների ու նպաստների վերաբերյալ տվյալներ դեռ չեն հրապարակվել, բայց հայտնի է, որ նպաստները այս տարվա ընթացքում չեն բարձրացել, իսկ միջին կենսաթոշակը վերջերս բարձրացել է 8%-ով, որը տարեկան միջինով հաշվարկելու դեպքում չի գերազանցի մի քանի տոկոսը:
Փաստորեն, ստացվում է, որ գնալով խորանում է գների բարձր աճի և անվանական աշխատավարձի տարբերությունը, ինչը նշանակում է, որ ավելի ու ավելի շատ է նվազում իրական աշխատավարձը: Կենսաթոշակների աճը ևս, այսպես ասած, «չի հասցնում» գների հետևից, այնպես որ` կյանքը Հայաստանում գնալով ավելի ու ավելի է բարդանում, նույնիսկ` ազգային վիճակագրական ծառայության թվերի համաձայն:
