Անգլիայի Պրեմիեր լիգայի 3-րդ տուրի կենտրոնական խաղում այսօր «Լիվերպուլը» կհյուրընկալի «Արսենալին»: 2-րդ տուրից հետո այս թիմերը 6-ական միավորով կիսում են առաջին հորիզոնականը: Լոնդոնյան ակումբն առաջին տուրում հյուրընկալվելիս 1:0 հաշվով առավելության էր հասել «Նյուքասլի» նկատմամբ, իսկ երկրորդ տուրում սեփական հարկի տակ 2:1 հաշվով հաղթել է «Բարնլիին»: «Լիվերպուլը» նախ 4:1 հաշվով հաղթել էր «Նորվիչին», այնուհետև 2:1 հաշվով առավելության է հասել «Սաութհեմփթոնի» նկատմամբ: Բուքմեյքերները այս խաղում բացահայտ ֆավորիտ են համարում «Լիվերպուլին» վերջինիս հաղթանակի համար սահմանելով 1․53 գործակից: Ոչ-ոքի գնահատված է 4․8, իսկ «Արսենալի» հաղթանակը՝ 6․4 գործակցով:
Նախորդ մրցաշրջանի համեմատ լոնդոնյան ակումբում նկատելի են որոշակի փոփոխություններ, որոնք, ըստ կանխատեսումների, կարող են բեկումնային դառնալ: Ամրացնելով պաշտպանությունը՝ «Արսենալի» գլխավոր մարզիչ Ունայ Էմերին թարմություն է հաղորդել առջևի գծին՝ խաղային այս օղակում հնարավորություն տալով երիտասարդ խաղացողներ Նելսոնին և Ուիլոքին, ինչպես նաև թիմի նորեկ Պեպեին: Վերջինս փորխարինման դուրս գալով «Բարնլիի» հետ հանդիպման երկրորդ կեսում լավ տպավորություն էր թողել և լուրջ հավակնություններ ունի հիմնական կազմի խաղացող դառնալու: Ֆուտբոլի Հայաստանի ազգային հավաքականի ավագ Հենրիխ Մխիթարյանը «Նյուքասլի» հետ խաղում «Արսենալի» մեկնարկային կազմում էր, սակայն ցուցադրելով ոչ այնքան վստահ խաղ արժանացել էր ամենացածր գնահատականի: Արդեն իսկ նշել էինք, որ մրցաշրջանի մեկնարկին Մխիթարյանը պետք է բարելավի խաղը, քանզի թիմում մեծացել է մրցակցությունը, և մի քանի ոչ այնքան հաջող հանդիպումների պարագայում հայ ֆուտբոլիստը կարող է կորցնել տեղը մեկնարկային կազմում: Առաջին տուրում Մխիթարյանին փոխարինած Մարտինելլին 18 տարեկան է և, մասնագետների կարծիքով, կարող է եղանակ ստեղծել «Արսենալում»: Պրեմիեր լիգայի մեկնարկից առաջ լոնդոնյան թիմի գլխավոր մարզիչ Ունայ Էմերին նրան հաճախ է հնարավորություն տվել դրսևորվելու, և նա կարծես արժանացել է իսպանացի մասնագետի վստահությանը:
Կարճ ասած՝ այսօր «Արսենալում» կան 3-4 երիտասարդ կադրեր, որոնք հիմնական կազմի համար պայքարում լուրջ մրցակից են թե՛ Մխիթարյանի, թե՛ մյուս փորձառու ֆուտբոլիստների համար: Հիշեցնենք, որ երկրորդ տուրում Մխիթարյանը պահեստայինների շարքում էր և խաղաժամանակ չէր ստացել: Վերջին օրերին անգլիական մամուլը գրում է, որ Էմերին «Բարնլիի» հետ խաղից հետո կողմնորոշվել է հիմնական կազմի ձևավորման հարցում, որտեղ առանձնակի դեր ունեն երիտասարդ կադրերը: Ըստ ԶԼՄ-ների Մխիթարյանը տեղ չունի ներկայիս «Արսենալի» հիմնական կազմում: Ըստ բրիտանացի վերլուծաբանների հայ ֆուտբոլիստն այսօր էլ չի լինի «Արսենալի» մեկնարկային կազմում: Կանխատեսումների համաձայն «Արսենալն» այսօր կխաղա 4-2-3-1 դասավորությամբ:
Դարպասը կպաշտպանին Լենոն, իսկ պաշտպանության կենտրոնում կխաղան Դավիդ Լյուիսն, ու Սոկրատիսը: Պաշտպանության աջ եզրում կլինի Մայթլենդ-Նայլսը, իսկ ձախ եզրում՝Մոնրեալը: Հենակետային գոտում Ջակայի կողքին կլինի Սեբալիոսը: Ենթահարձակվողի դիրքում հավանաբար կտեսնենք Օզիլին, իսկ կիսապաշտապանության աջ եզրում Պեպեին: Օբամեյանգը կխաղա ձախ եզրում, իսկ հարձակման կրակագծում՝ Լակազետը:
Շատերի կարծիքով այս պահին սա «Արսենալի» ամենաօպտիմալ կազմն է: Ամեն դեպքում չի կարելի բացառել, որ Հայաստանի ազգային հավաքականի կիսապաշտպանն այսօր խաղաժամանակ կստանա: Մխիթարյանին անհրաժեշտ է օգտագործել իր հնարավորությունը ապացուցելու համար, որ թիմի առանցքային խաղացողներից է: «Լիվերպուլ»-«Արսենալ» հանդիպումը կսկսվի Երևանի ժամանակով 20:30-ին: