Կառավարությունը «Իրազեկ քաղաքացիների միավորում» և «Թրանսփարենսի ինթերնեշնլ» հակակոռուպցիոն կենտրոն հասարակական կազմակերպություններին հատկացվեց 33 միլիոն 680 հազար դրամ սեպտեմբերի 8-ին Արցախում տեղի ունենալիք ՏԻՄ ընտրություններին դիտորդական առաքելություն իրականացնելու համար: Կառավարության նիստին վարչապետ Նիկոլ Փաշինյանը նշեց, որ Հայաստանի կառավարությունը և անձամբ ինքը ՀՀ-ն պետք է հավելյալ երաշխիքների ստեղծմանը աջակցի, որպեսզի երաշխավորվի Արցախի ժողովրդի ազատ կամարտահայտությունը: Պաշտոնական Արցախը ողջունում է քայլը։
«Առհասարակ, Արցախում ընտրությունները միշտ անցել են բաց և թափանցիկ, և մենք միշտ շահագրգիռ ենք եղել, որ դիտորդներ գան և դիտորդական առաքելություն իրականացնեն։ Սա համարում ենք շատ կարևոր՝ Արցախը արտաքին աշխարհին ճանաչելի դարձնելու տեսակետից, որ տեսնեն՝ ժողովրդավար երկիր ենք, ինչու չէ նաև փորձի փոխանակումը կարևոր ենք համարում»,- «Առաջին լրատվական»-ի հետ զրույցում ասաց Արցախի Հանրապետության նախագահի մամուլի խոսնակ Դավիթ Բաբայանը։
Անդրադառնալով այն քննադատություններին, թե այս գումարի հատկացումը անհասկանալի է և Փաշինյան-Արցախ բախման օրակարգի սպասարկում է, քան թափանցիկ ընտրությունների ապահովման հայտ, Դավիթ Բաբայանը նշեց․ «Ավելի ճիշտ կլինի՝ Հայաստանի կառավարությունից ճշտել նպատակահարմարությունը, բայց, կրկնում եմ, մենք շահագրգռված ենք, որպեսզի տարբեր դիտորդական առաքելություններ գան Արցախ»։
Բաբայանը նշեց, որ օգոստոսի 15-ից մեկնարկած քարոզարշավը բավականին ակտիվ է ընթանում, ավելի քան 220 համայնքում ընտրություններ են լինելու, հատկապես ակտիվ է Ստեփանակերտը։
«Մինչ այս պահը սև փիառ չի եղել, ակտիվ, բայց փոխադարձ հարգանքի մթնոլորտ է»,- ասաց Դավիթ Բաբայանը։ Վերջինս նշեց, որ նախագահական և խորհրդարանական ընտրություններին ավելի մեծ քանակությամբ դիտորդներ կլինեն, և առաջին անգամ է, որ ՏԻՄ ընտրություններին այսքան մեծ ուշադրություն է դարձվում։