Վարչապետի բոլոր հանձնարարականները և կառավարության որոշումները հիմնվում են առկա փաստերի ու հանգամանքների վրա՝ սկսած քրեական գործից, վերջացրած բոլոր հանգամանքների ուսումնասիրությամբ։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արմեն Խաչատրյանը՝ անդրադառնալով Ամուլսարի շուրջ ստեղծված իրավիճակին։
Նրա խոսքով, վարչապետ Նիկոլ Փաշինյանը հայտարարել էր, որ այս պահի դրությամբ առկա բոլոր փաստերն ու հանգամանքներն ուսումնասիրված են քրեական գործի շրջանակներում և որևէ իրավական հիմք չկա հանքի շահագործումը դադարեցնելու համար. «Միակ ձևը հանքի շահագործումը դադարեցնելու ապօրինի որոշումն է։ Սակայն այս ընթացքում ևս վարչապետն ուշի ուշով հետևում է նոր ի հայտ եկած բոլոր հանգամանքներին, անգամ փոքր կասկածներին, և այդ կասկածները փարատելու համար ուղարկում են մասնագիտական եզրակացություն տալու»,-հայտարարեց Արմեն Խաչատրյանը։
Ինչ վերաբերում է նրան, որ ինքը հայտարարել է, որ հանքի շահագործումը արգելելու պարագայում միջազգային արբիտրաժային ատյաններում Լիդիան ընկերությանը վնասի փոխհատուցման հայցի բավարարման դեպքում խոսք կարող է լինել 1 մլրդ դոլարի մասին, Արմեն Խաչատրյանն արձագանքեց, որ դա հնարավորի փաստեր չեն. «Եթե մենք դա ծածկենք շղարշով, կհայտնվենք փակուղու մեջ» «Այսօր որևէ հայի համար գաղտնիք չէ, որ մեր գերակա խնդիրը մեր հայրենիքի պաշտպանությունն է։
Մենք գիտենք, որ Հայաստանը ցանկացած պահի կարող է հայտնվել պատերազմական իրավիճակում։ Ես ուզում եմ հիշեցնել «Նաիրիտի» փակման օրինակը։ Ազգային շարժումն սկսվեց բնապահպանական շարժումով, երբ «Նաիրիտը» ներկայացվեց որւես ազգի գենոֆոնդը քայքայող արտադրությունը։ Ամբողջ հայ ազգը դուրս եկավ ու փակեց այդ գերհսկա գիգանտին ու հիմա դրա դառնությունը տեսնում ենք տասնամյակներ։ Նույնը եղավ Ատոմակայանի հետ»,-ասաց նա՝ հավելելով, որ մենք դասեր չենք քաղել մեր անցյալից։
