Օրվա թեման շարունակում է մնալ Ամուլսարի շահագործման հարցը, դրա շուրջ քաղաքական քննարկումները չեն դադարում։
Վարչապետ Նիկոլ Փաշինյանն այսօր գրառում է արել ու նշել, որ շարունակում է քննարկումներն Ամուլսարի հանքի շահագործման շուրջ։ Ամուլսարի շահագործման կամ չշահագործման դեպքում քաղաքական տեսանկյունից ինչպիսի՞ զարգացումներ են սպասվում․ «Առաջին լրատվական»-ի հարցին «Գելլափ ինթերնեյշնլ ասոցիացիայի» հայաստանյան գրասենյակի ղեկավար Արամ Նավասարդյանը պատասխանեց․ «Քաղաքական մասով շատ պարզ էր․ ընդդիմությունը պետք է օգտագործեր այս հնարավորությունը՝ թիրախավորելով Փաշինյանին և նրա թիմին։ Իսկ եթե մենք անդրադառնում ենք Ամուլսարի ընդհանրապես խնդրին, ես կարող եմ նշել, որ շատ հազվադեպ եմ համաձայնվում Նիկոլ Փաշինյանի և իր թիմի կայացրած որոշումներին, բայց սա այն դեպքն է, որ ես ողջունում եմ վարչապետի որոշումը։ Ես նույնիսկ կարող եմ ասել, որ այն նույնիսկ ուշացած որոշում էր»։
Իսկ քաղտեխնոլոգ Կարեն Քոչարյանն ասաց․ «Երբ դեռ չկար այս որոշումը, երբ անգամ «Էլարդ»-ին էլ չէին հրավիրել, ես միշտ զարմանում էի, թե ինչի է ուշանում, որովհետև կա երկու խնդիր։ Եթե այն Սևանին կվնասի, ապա ոչ մի հայ չի ցանկանա, որ այն աշխատի։ Իսկ եթե չի վնասում, ապա այն պետք է աշխատի, որովհետև այն արդյունաբերության ճյուղ է։ Այլ բան է, որ պետք է օրենսդրական փոփոխություններ կատարել․ ինչպես աշխարհի շատ երկրներում, բացի շահութահարկից, պետք է բնապահպանական վճար վճարեն։ Աշխարհում ամեն տեղ էլ կա հանքարդյունաբերություն, այդ թվում՝ զարգացած երկրներում։ Պարզապես պետք է հետևեն, որ ֆիլտրները նորմալ դրվեն, բնությանը չտա վնասներ։ Իսկ ինչ վերաբերում է նրան՝ քաղաքական է, թե ոչ, ապա ավելին ասեմ՝ Հայաստանում ԱՄՆ վերջին երկու դեսպանները ոչ թե ակնարկել են, այլ ասել են, որ եթե «Լիդիանը» չաշխատի, ապա ներդրումներ և այլ գումարային մուտքեր չի լինի ԱՄՆ-ի կողմից։ Իսկ Միացյալ Նահանգները մեզ համար երրորդական-չորրորդական երկիր չէ»։
Մանրամասները՝ տեսանյութում։
