ԱԺ պատգամավոր Արման Բաբաջանյանը ֆեյսբուքյան իր էջում գրել է.
Մեզանում իրավիճակը գնահատելիս բավական տարածված է մոտեցումը, թե մեղավորը կամ Ռուսաստանն է, կամ Ամերիկան, որոնք իրենց շահերի համար Հայաստանի հերը կարող են անիծել:
Իրականում այդ մտայնությունն անգամ փաստական առումով ճիշտ լինելու դեպքում էլ ահավոր վտանգավոր մի մտայնություն է: Դա թևաթափ անող մտայնություն է, երբ ամեն ինչի հետևում տեսնում ես արտաքին պատճառներ: Դրանով ընդամենն արդարացվում է ներքին անզորությունն ու անկենսունակությունը:
Իրականում, եթե անգամ արտաքին ուժերի ազդեցությամբ են Հայաստանում շատ խնդիրներ գոյանում, միևնույն է դրա պատճառները կրկին ներսում են, կրկին Հայաստանի իշխանության մեջ են և քաղաքական դաշտում, որտեղ չի դրսևորվել բավարար կամք, որ երկիրը լինի իրապես անկախ, որ երկրում լինի արդարություն, ազատություն և օրինականություն, ինչը Հայաստանը զգալիորեն զերծ կպահեր արտաքին որևէ ազդեցությունից և Հայաստանը ոչ թե տարատեսակ փորձարկումների օբյեկտ կդիտվեր, այլ կլիներ արտաքին կենտրոնների գործընկեր սուբյեկտ:
Մենք ենք մեղավոր, որ չենք կարողացել ստեղծել այնպիսի պայմաններ, այնպիսի պետություն, որտեղ արտաքին ուժերը չէ, որ կորոշեն այս կամ այն բանի լավ, թե վատ զարգացումը: Հասարակությունը պետք է հասկանա, որ Հայաստանը ունի արտաքին ազդեցությունից ձերբազատվելու այլընտրանք`դա սեփական քաղաքացիներին հարգող, նրանց իրավունքները պաշտպանող և ազատությունները երաշխավորող պետության կայացումն է:
Եվ դա միմիայն Հայաստանում, Հայաստանի ուժերով լուծվելիք խնդիր է, այլ ճանապարհ չկա: Եվ եթե մենք իսկապես ձեռնամուխ լինենք այդ խնդրի լուծմանը, ապա ամենամեծ ցանկության դեպքում անգամ, եթե, կրկնում ենք` հավատանք այդ միջազգային ազդեցությունների տեսությանը, որն այլ կերպ դավադրությունների տեսություն է անվանվում, ապա ոչ մի միջազգային ուժ չի կարող իր կամքը պարտադրել իր կյանքը հավասարության, ազատության և եղբայրության իրական սկզբունքով կառուցող հասարակությանն ու պետությանը:
https://www.facebook.com/babajanyana/posts/2664319323598778
