Եվրոպա լիգայի խաղարկության փլեյ-օֆի առաջին մրցավեճում վաղը «Արարատ-Արմենիա»-ն կհյուրընկալի Լյուքսեմբուրգի չեմպիոն «Դյուդելանժ»-ին:
Առաջին անգամ մասնակցելով Հայաստանի Բարձրագույն խմբի առաջնությանը և նվաճելով չեմպիոնի կոչումը՝ «Արարատ-Արմենիա»-ն եվրագավաթներում պայքարը սկսել էլ Չեմպիոնների լիգայի որակավորման առաջին փուլից: Այստեղ մեր թիմը լարված պայքարում երկու հանդիպումների արդյունքում 4:3 հաշվով զիջել էր Շվեդիայի չեմպիոն ԱԻԿ-ին: Հայտնվելով Եվրոպա լիգայի որակավորման երկրորդ փուլում՝ «Արարատ-Արմենիա»-ն երկու հանդիպումների արդյունքում 4:1 հաշվով հաղթել էր Ջիբրալթարի չեմպիոն «Լինկոլն»-ին: Եվ վերջապես, որակավորման երրորդ փուլում մեր չեմպիոնը պայքարից դուրս թողեց Վրաստանի չեմպիոն «Սաբուրթալո»-ին:
Հիշեցնենք, որ Երևանում 1:2 հաշվով զիջելուց հետո «Արարատ-Արմենիա»-ն Թբիլիսիում գերլարված պայքարում 2:0 հաշվով հաղթանակ էր տոնել: Այս դիմակայությունում վճռորոշ էին «Արարատ-Արմենիա»-ի գլխավոր մարզիչ Վարդան Մինասյանի տակտիկական գործողությունները: Վրաստանի չեմպիոնը անհամեմատ ավելի խաղացված թիմ է, և առաջին հանդիպումից հետո ոչ բոլորն էին հավատում, որ հնարավոր կլինի հաղթանակի հասնել Վրաստանում: Շտկելով երևանյան խաղում առկա բացթողումները՝ Վարդան Մինասյանը տակտիկական առումով ուղղակի կապիտուլյացիայի էր ենթարկել «Սաբուրթալո»-ին և վերջինիս մարզչական շտաբին:
Հիմա հասել ենք մի կետի, որտեղ սխալվել կամ վրիպել ուղղակի չի կարելի: Խաղային որոշ գործոններով «Արարատ-Արմենիա»-ն առավելություն ունի «Դյուդելանժ»-ի նկատմամբ: Ըստ Transfermarkt պարբերականի՝ «Արարատ-Արմենիա»-ում հայտավորված 25 ֆուտբոլիստների տրանսֆերային ընդհանուր արժեքը կազմում է 5.65 միլիոն եվրո, մինչդեռ «Դյուդելանժ»-ում հայտավորված 38 խաղացողների ընդհանուր արժեքը 4.23 միլիոն է: Կարծում ենք՝ տարբերությունն ակնհայտ է: «Դյուդելանժ»-ի ամենաթանկ ֆուտբոլիստը կիսապաշտպան Շարլզ Մորենն է, որի տրանսֆերային արժեքը 300 հազար եվրո է: Այս ֆուտբոլիստը «Դյուդելանժ» է տեղափոխվել բոլորովին վերջերս՝ բելգիական «Սենթ Գիլոս» ակումբից:
Նշենք, որ ամառային տրանսֆերային պատուհանի ընթացքում «Դյուդելանժ»-ը ձեռք է բերել միանգամից 21 նոր ֆուտբոլիստների: Սա նշանակում է, որ «Դյուդելանժ»-ի գլխավոր մարզիչ Էմիլիո Ֆերերան ձևավորում է նոր կոլեկտիվ: Հիշեցնենք, որ ձմեռային տրանսֆերային պատուհանի ժամանակ «Դյուդելանժ»-ից հեռացել էին թիմի առաջատար ֆուտբոլիստները, որոնց շնորհիվ Լյուքսեմբուրգի չեմպիոնը դուրս էր եկել Եվրոպա լիգայի խաղարկության խմբային փուլ:
«Արարատ-Արմենիա»-ի ամենաթանկ ֆուտբոլիստը Զաքարիա Սանոգոն է, որի տրանսֆերային արժեքը գնահատված է կես միլիոն եվրո: Ավելին, Հայաստանի չեմպիոնի կազմում կան 9 ֆուտբոլիստներ, որոնց տրանսֆերային արժեքը 300 հազար և ավելի եվրո է:
Մենք իսկապես բացառիկ հնարավորություն ունենք պատմություն կերտելու և առաջին անգամ խաղալու Եվրոպա լիգայի խմբային փուլում: Նման հնարավորություն կարող է երկար ժամանակ չլինել: Կշեռքի վրա դնելով դիմակայության բոլոր արգումենտները՝ պետք է փաստենք, որ մենք ունենք շոշափելի առավելություն, որը պարտավոր ենք նյութականացնել:
«Դյուդելանժ»-ի գլխավոր զենքը թերևս փորձառու գլխավոր մարզիչն է, որը հատկապես տակտիկական տեսանկյունից բավական ուժեղ է: 52-ամյա բազմափորձ այս մասնագետը երկար տարիներ աշխատել է բելգիական թիմերում: Նրա նախընտրելի դասավորությունը 4-2-3-1-ն է, սակայն Ֆերերային բնորոշ է, կախված մրցակցից, հաճախակի կիրառել այլ տակտիկական սխեմաներ: Օրինակ՝ Եվրոպա լիգայի խաղարկության որակավորման երրորդ փուլում Էստոնիայի չեմպիոնի հետ առաջին խաղում «Դյուդելանժ»-ը սեփական հարկի տակ խաղացել է 4-2-3-1, դասավորությամբ, իսկ պատասխան խաղում Ֆերերան պայքարել է 5-3-2 դասավորությամբ: Հավանական է, որ վաղվա խաղում ևս «Դյուդելանժ»-ը խաղա 5 պաշտպանով՝ ապավինելով հակագրոհներին:
Առաջիկա դիմակայության գլխավոր ֆիգուրը բնականաբար կլինի Վարդան Մինասյանը, ում գլխավոր խնդիրը մրցակցի գլխավոր մարզչի նկատմամբ մարտավարական հաղթանակի հասնելն է: Վստահ ենք, որ Մինասյանն ի զորու է լուծել այս խնդիրը: Նշենք, որ Վարդան Մինասյանի նախընտրելի մարտավարությունը ևս 4-2-3-1-ն է: Բացառությամբ «Սաբուրթալո»-ի հետ երևանյան մրցավեճի, որտեղ Մինասյանը նախընտրել էլ 4-3-3 հարձակողական սխեման, եվրագավաթի մյուս բոլոր հանդիպումներում «Արարատ-Արմենիա»-ն խաղացել է 4-2-3-1 դասավորությամբ: Հաշվի առնելով նաև Վրաստանի չեմպիոնի հետ Երևանում կայացած խաղի դառը փորձը՝ հավանականությունը մեծ է, որ վաղը «Արարատ-Արմենիա»-ն կխաղա հենց 4-2-3-1 դասավորությամբ:
Ինչևէ, բուքմեյքերները վաղվա խաղում նախապատվությունը տվել են դաշտի տերերին: «Արարատ-Արմենիա»-ի հաղթանակի համար սահմանված է 2.47 գործակից, ոչ-ոքին գնահատված է 3.33, իսկ «Դյուդելանժ»-ի հաղթանակը՝ 3.1 գործակից: