Չինական Sinogene ընկերությունը շուտով կսկսի կլոնավորված կատուների զանգվածային վաճառքը: Այս մասին երեքշաբթի հայտարարել է ZOL գիտատեխնիկական տեղեկատվական պորտալը:
Sinogene -ի ղեկավարությունը, ըստ պորտալի տվյալների, նման որոշում է կայացրել այս կենդանու առաջին գենետիկ օրինակը հաջող վերարտադրելուց հետո: Ապագայում ընկերությունը նախատեսում է ձիեր և փոստային աղավնիներ կլոնավորել:
Սխտոր անունով կատուն ծնվել է հուլիսի երկրորդ կեսին, բայց ստեղծողներն այդ մասին հայտարարել են մեկ ամիս անց, երբ կենդանին ամրացել է և ապացուցել իր կենսունակությունը:
«Այս հաջող փորձից հետո մենք կսկսենք կլոնավորման պաշտոնական ծառայություններ տրամադրել»,- լրատվամիջոցներին ասել է ընկերության գործադիր տնօրենի տեղակալ Չժաո Ցզյանպինը: Նրա խոսքերով, սիրելի ընտանի կենդանու կրկնօրինակը հնարավոր կլինի վերարտադրել 250 հազար յուանով (մոտ 35.4 հազար դոլար):
Պաշտոնական վիճակագրության համաձայն, Չինաստանում ավելի քան 73 միլիոն ընտանի կենդանիներ (91 միլիոն կատու և շուն) ունեցողներ կան: Չինաստանի խոշոր մեգապոլիսներում, որտեղ մի շարք գործոնների պատճառով շատերը նախընտրում են երեխա ունենալու փոխարեն ընտանի կենդանի պահել, կլոնների ստեղծման բիզնեսը հատկապես շահութաբեր է: Երկրում կատուների և շների շուկան գերազանցում է տասնյակ միլիարդավոր դոլարները՝ դինամիկորեն աճելով ամեն տարի: