«Առաջին լրատվական»-ի «Մամուլի հետ սուրճ» հաղորդման այսօրվա հյուրն է լրագրող Կարպիս Փաշոյանը:
«Պարզ չէ, թե իրադարձություններն ինչ հունով կզարգանան, սակայն փաստ է, որ Փաշինյանն ինքն իր ոտքերի տակ ական տեղադրեց»,- նշեց մեր զրուցակիցը՝ անդրադառնալով Ամուլսարի հանքի շահագործման վերաբերյալ վարչապետ Փաշինյանի երեկվա հայտարարությանը:
Նրա խոսքով՝ Ամուլսարի վերաբերյալ վարչապետի հայտնի դիրքորոշումը իր կառավարման շրջանի ամենամեծ, ամենակոպիտ սխալներից մեկն էր. «Փաշինյանի կառավարումը պայմանականորեն կարելի է բաժանել երկու շրջանի՝ մինչև այդ դիրքորոշումը հայտնելը և դիրքորոշումից հետո: Մինչև երեկ Փաշինյանը, նույնիսկ բազմաթիվ սխալների առկայությամբ, շարունակում էր պահպանել սակրալ խորհրդանիշի կարգավիճակը (քննադատություններում մարդիկ ամեն կերպ փորձում էին խնայել նրան), սակայն հիմա նա մսխեց իր այդ խորհրդանիշի կարգավիճակը և դարձավ սովորական մի կառավարիչ, որն այսուհետ թիրախավորվելու է այն նույն տրամաբանությամբ, ինչպես նախորդ կառավարիչները»:
Փաշոյանը բացասական է համարում այն, որ այդ վստահության ռեսուրսը մսխվեց ընդամենը 1,5 տարի անց. «Դա վտանգավոր է այնքանով, որ վարչապետը դեռևս այլընտրանք չունի, և նրա իշխանության լեգիտիմության քայքայումը չափազանց վտանգավոր է Հայաստանի Հանրապետության համար»:
Առավել մանրամասն՝ տեսանյութում: