ՌԴ նախագահ Վլադիմիր Պուտինը հավաստիացրել է, որ Արխանգելսկի շրջանի Սեվերոդվինսկի մերձակայքում գտնվող պոլիգոնում տեղի ունեցած վթարից հետո ռադիացիոն ֆոնի բարձրացման սպառնալիք չկա, իրավիճակը վերահսկվում է, ձեռնարկվել են կանխարգելիչ միջոցառումներ:
Միևնույն ժամանակ, Պուտինը նշել է, որ կանխարգելիչ միջոցառումներ են ձեռնարկվում «որպեսզի անակնկալներ չլինեն»:
Պուտինը նաև ասել է, որ Սեվերոդվինսկի մերձակայքում գտնվող պոլիգոնում տեղի ունեցած վթարի հետևանքով բոլոր զոհվածներն ու վիրավորները կներկայացվեն պետական մրցանակների:
ՌԴ պաշտպանության նախարարությունն Արխանգելսկի մարզի պոլիգոնում տեղի ունեցած միջադեպի մասին հաղորդել է օգոստոսի 8-ին: Ավելի ուշ «Ռոսատոմ» պետական կորպորացիան հայտարարել է, որ պոլիգոնում պայթյունը տեղի է ունեցել ծովային հարթակում՝ ռադիոիզոտոպի էներգիայի աղբյուրով հրթիռի փորձարկման ժամանակ:
Ողբերգության հետևանքով 7 մարդ է զոհվել՝ «Ռոսատոմի» հինգ աշխատակից և ՌԴ ՊՆ երկու ներկայացուցիչ: Պայթյունի հետևանքով վիրավորվել է երեք զինվորական և «Ռոսատոմի» երեք մասնագետ: Պետական կորպորացիան ողբերգությունը հանգամանքների անհաջող զուգադիպությամբ է բացատրել, ինչը հաճախ է տեղի ունենում նոր տեխնոլոգիաների փորձարկման ժամանակ:
Սեվերոդվինսկի իշխանությունները և Ռոսհիդրոմետը օգոստոսի 8-ին հայտնել են, որ Սեվերոդվինսկում արտակարգ պատահարի օրը ճառագայթային ֆոնը կարճ ժամանակով աճել է, այնուհետև վերադարձել է նորմալ ցուցանիշի:
