ԱԺ պատգամավոր Արման Բաբաջանյանը ֆեյսբուքյան իր էջում գրել է
Հեղափոխված Հայաստանի նոր իշխանությունից պահանջվում էր ձևավորել այնպիսի էլիտա, որը երկրի կառավարման մեջ կսկզբնավորեր լիովին այլ պրոցես՝ հիմքում, առանցքում դնելով հանրային ունեցվածքի վերադարձ հասարակությանը:
Այստեղ իրավիճակը պետք չէ պատկերացնել պարզունակ մոտեցումներով կամ կուլակաթափության ռադիկալ դրսևորումներով: Խոսքը հանրային և պետական կյանքի ոլորտներում պաշտպանված, պետությամբ երաշխավորված արդարացի մրցակցության գաղափարի ներդրման մասին է:
Այսինքն՝ Հայաստանում առկա մի շարք սոցիալական, քաղաքական, իշխանական իրողությունների, համակարգային առանձնահատկությունների համատեքստում, հանրային և պետական ունեցվածքի վերադարձի գործում առաջնայինը ոչ թե խլված նյութականը, այլ նյութականը ստեղծելու կամ պահպանելու հնարավորությունը վերադարձնելու կարևորությունն է:
Որևէ մեկից որևէ բան խլել ու աղքատներին բաժանել, ազգայնացնել և այդ կարգի այլ գործողությունների ենթարկել պետք չէ: Պետք է հասարակությանը վերադարձնել ստեղծելու, ստեղծածը պահպանելու օրինական հնարավորությունը: Դա արդեն իսկ բավարար կլինի, որպեսզի հանրային համակեցությունը բավական արագ տեմպով վերադառնա մի իրավիճակի, երբ աստիճանաբար կսկսի վերականգնվել հանրայինի և անձնականի խախտված կամ գերխախտված բալանսը: Ընդ որում՝ ոչ միայն զուտ թվաբանական կամ վիճակագրական իմաստով, այլ նաև, այսպես ասած, աշխատանքային արդյունքի արդարացիության:
Այսինքն՝ բևեռացվածության խնդիրը այն չէ միայն, որ մի տեղ շատ-շատ է գնում՝ գնում է, մեծ հաշվով, բոլորին պատկանողը, այլ նաև այն, որ գնում է անարդարացիորեն:
Հեղափոխությունից հետո իշխանությունը ոչ թե գնում է հանրայինը հանրությանը, պետականը պետությանը վերադարձնելու, այլ խլվածը, յուրացվածը, նախկինների ողջ այլասերված ժառանգությունը կուլ տալու ճանապարհով: