«Շատ բարդ իրավիճակ է ստեղծվել՝ կապված Ամուլսարի հանքի շահագործման խնդրի հետ… 88-ի շարժումը նույնպես սկսվեց բնապահպանական խնդրով»,- այս մասին «Առաջին լրատվական»-ի հետ զրույցում ասաց գրող, կինոսցենարիստ Վահրամ Մարտիրոսյանը՝ հավելելով, որ թեև ինքն էլ դեմ է օդի, բնության աղտոտմանը, բայց պետք է հաշվի առնել նաև աղքատ երկրի ֆենոմենը: «Մենք միայն տնտեսական կամ միայն բնապահպանական գործոնն ենք հաշվի առնում: Ես կուզենայի, որ մեր կառավարությունը այդ առումով լիներ այնքան արհեստավարժ և վստահելի, որ որոշում կայացնելու պատասխանատվությունը ստանձներ: Կառավարությունը պատասխանատու է, այս վճռի տերը Նիկոլ Փաշինյանն է, և եթե դա եղավ պարտություն, ինքն է պատասխանատու՝ իր քաղաքական համախոհների հետ, իսկ եթե հաղթանակ եղավ, հանքը շահագործվեց առանց մեծ վնաս պատճառելու, ուրեմն սա կլինի մեր պետության զարգացման փուլերից մեկը, և մենք կունենանք նաև լուրջ այլընտրանքներ հանքարդյունաբերությանը»:
Հրապարակախոսի դիտարկմամբ՝ Ամուլսարի հարցը շատ էական է, կարող է լինել նախադեպային և հնարավոր է մյուս հանքերի հետ կապված նույնպես շարժումներ առաջանան:
Անդրադառնալով դիտարկմանը, որ Ամուլսարի խնդրի վերաբերյալ հասարակությունը տարբեր կածիքներ ունի, մի մասը կողմ է հանքի շահագործմանը, մյուս մասը՝ հակառակը՝ դավաճան է համարում նրանց, ովքեր կողմ են, Վ. Մարտիրոսյանը նկատեց, որ կա նաև մի հատված, որը համեստաբար լռում է, քանի որ բավականաչափ իրազեկ չէ, որպեսզի գործընթացներին մասնակցի, որոնց թվին նաև ինքն է պատկանում: «Կուզենամ անդրադառնալ հնչերանգներին. ինքս էլ դյուրաբորբոք եմ, բայց միշտ խուսափել եմ «դավաճանություն», «դավաճաններ» տերմիններից, որովհետև պատմության ընթացքում դավաճաններն ու հերոսներն իրենց տեղերը հաճախ շատ արագ փոխում են… Ես կխնդրեի, որ բոլորս զուսպ լինենք… Կարևոր է, որ չկորցնենք այն արժեքներն ու նպատակները, որի համար տեղի ունեցավ հեղափոխությունը»:
Մանրամասն՝ տեսանյութում:
