«Առաջին լրատվական»-ի զրուցակիցն է ԱԺ «Իմ քայլը» խմբակցության քարտուղար Հակոբ Սիմիդյանը:
– Պարո՛ն Սիմիդյան, լսեցինք վարչապետին, մի բան պարզ է՝ Ամուլսարի հանքը, ամենայն հավանականությամբ, կշահագործվի. սա այս խնդրի միա՞կ լուծումն էր:
– Այն ընթացքը, որ ունեցավ քրեական գործը, կառավարությանը թույլ չի տալիս այլ դաշտ մտնել, այսինքն՝ չի թողնում, որ չշահագործելու հնարավորություն ունենա: Քրեական գործը այս եզրակացության հանգեցրեց, և այն վիճակը, որ ունենք, ենթադրում է, որ ինչքան էլ ցավալի վիճակ է, հանքը պետք է շահագործվի: Ամեն դեպքում խնդիրը բարդ է, մեր կառավարությունը ժառանգել է այս խնդիրը, և մենք որոշ իմաստով նաև հետևանքների հետևից ենք ընկել: Իհարկե, բարդ որոշում կլինի, այս պահին չխոսեմ որոշման մասին, կառավարությունն այդ մասին կհայտարարի, բայց կարծեք թե այլընտրանք չունենք:
– Հիշեցնեմ՝ ամիսներ առաջ իշխանության ներկայացուցիչն ասաց. «Այս լիցենզիան հաստատ չէինք տրամադրի, եթե այն մեր օրոք լիներ, լիցենզիան մերժելու հազար ու մի հիմնավորումներ կան»: Հիմա այդ հիմնավորումները չկան, և դուք վավերացնում եք մի փաստաթուղթ, որը նախկինները տվել են ձեզ: Մի՞թե այդ պայմանագիրն այնքան անթերի է, որ թույլ եք տալիս շահագործվի հանքը:
– Անթերիությունը կամ թերի լինելը քրեական գործի, փորձագիտական տարբեր գործընթացների արդյունքում արձանագրված փաստերի շրջանակում է քննվում: Կառավարությունը ջանք չի խնայել, որ ունենա օբյեկտիվ պատկեր: Նաև վարչապետն այդ պատկերը նկարագրեց, ավելին այս պահին չեմ կարող ասել:
– Անձամբ ձեզ ի՞նչ տվեց վարչապետի հետ հանդիպումը. այսօր վարչապետի հետ հանդիպում էր ձեր խմբակցությունում, որը բավականին երկար է տևել:
– Ավելի քան երկու ժամ է տևել: Պատգամավորները հարցեր ունեին, այդ հարցերն են քննարկվել: Վարչապետն ուղիղ եթերում խմբակցության նիստի ժամանակ քննարկված հարցերի մասին խոսեց: Բավականին բաց քննարկում է եղել, բոլոր դետալները քննարկվել են:
– Այսինքն՝ կային պատգամավորներ, որոնք դեմ էին Ամուլսարի շահագործմանը:
– Այո, դեմ էին որոշակի փաստերի հիման վրա, այդ մասին հարցեր հնչեցին, պատասխաններ նույնպես հնչեցին: Գաղտնիք չէ, որ դեմ պատգամավորներ ունենք: Փիլիսոփայորեն հանքարդյունաբերության վերաբերյալ յուրաքանչյուրս՝ վարչապետից սկսած, ունենք բացասական վերաբերմունք, բնության հանդեպ սերը բոլորիս մեջ մեծ է: Հանդիպմանը եկել էր նաև Քննչական կոմիտեի և քննչական խմբի ղեկավարը, և նրանք նույնպես պատասխանեցին հնչած հարցադրումներին, բավականին խոր քննարկում է եղել:
– Ձեր խմբակցության պատգամավորների շարքում կան այնպիսիններ, ովքեր բնապահպաններ են և ակտիվորեն պայքարել են Ամուլսարի շահագործման դեմ:
– Ես նույնպես ժամանակին մասնակցել եմ բնապահպանական ակցիաներին, կարծում եմ՝ մեր խմբակցությունում բոլորն են մասնակցել, այսինքն՝ բնապահպանական գործընթացները շատերիս համար հարազատ է:
– Բայց քաղաքական կոնյունկտուրան փոխում է ձեր որոշ սկզբունքներ, թե՞ շատ խիստ եմ ասում:
– Ամեն դեպքում, մենք ժառանգած խնդիր ենք քննարկում, այո, եթե մենք լինեինք որոշողը կամ լիցենզիա տրամադրողները, այն զգացողությունները և փաստերը, որ բերում են մեր պատգամավորները, բնականաբար խոչընդոտներ կառաջացնեին, և հաստատ չէինք ունենա այն պատկերը, որ Ամուլսարի դեպքում ունենք, և առհասարակ հանքարդյունաբերության վերաբերյալ այլ պատկեր կունենայինք:
– Մի կողմից՝ բարձր ստանդարտներ ենք առաջադրում «Լիդիանին», բայց մյուս կողմից՝ նույն ստանդարտները չենք առաջադրում գործող հանքերի նկատմամբ: Ձեզ համար հասկանալի՞ է այս իրավիճակը:
– Մենք հայտարարել ենք, որ մեր տնտեսությունը չպետք է հիմնված լինի հանքարդյունաբերության վրա: Նոր իշխանություններն այս ուղղությամբ գնալու են և գնում են: Իմ գործընկերները հարցազրույցների ժամանակ փաստեր են ներկայացրել, որ տնտեսության մեջ հանքարդյունաբերության տեսակարար կշիռը քչանում է, և այս պրոցեսը, համոզված եմ, շարունակական է լինելու: Այսինքն՝ հանքարդյունաբերության վերաբերյալ գործընթացներն առջևում են, և գործող հանքերի հանդեպ վերաբերմունքն առջևում է, այդ գնահատականները կլինեն, և ամեն ինչ անելու ենք, որ համապատասխանեն անհրաժեշտ ստանդարտներին: Ամուլսարի դեպքում փորձաքննություն է տեղի ունեցել, քրեական գործ է հարուցվել՝ պատասխան ունենալու համար, մյուս հանքերի վերաբերյալ նույնպես այդ պատասխաններն ունենալու ենք:
– Մի քանի օր առաջ պաշտոններից ազատվեցին պաշտոնյաներ՝ վարչապետի խորհրդականը և օգնականներից մեկը. դա կապ ունի՞ այս գործընթացների հետ:
– Ես չունեմ նման տեղեկություն, որ որևէ կերպ կապ ունեն: Չէ՛, չեմ կարծում, որ կապ ունեն:
– Դուք անձամբ ինչ եք կարծում, այդ փորձաքննությունը կատարած ընկերության և «Լիդիան Արմենիա» ընկերության նկատմամբ անվստահությունը որտեղի՞ց է գալիս:
– Կարծում եմ առաջին հերթին նրանից, որ այդ գործընթացները եղել են նախկին իշխանությունների օրոք, սա արդեն այնպիսի հանգամանք է, որ անվստահության հանգամանք է ստեղծում: Փորձաքննության առումով, մենք միայն ELARD-ի փորձաքննությունը չպետք է դիտարկենք, որովհետև քրեական գործ է հարուցվել, որն ընթացել է մինչև ELARD-ի խաղի մեջ մտնելը, փորձագիտությանը ներգրավված են եղել նաև տեղական փորձագետներ՝ ԳԱԱ-ից, ԵՊՀ-ից, այսինքն՝ փորձագիտական աշխատանքներ են իրականացվել նաև հենց քրեական գործի շրջանակում, այսինքն՝ միայն ELARD-ի եզրակացությունով չէ պայմանավորված, ELARD-ի եզրակացությունը հավելյալ գործիք է, որը հավելյալ նյութեր է ապահովել քրեական գործի համար:
– Անվստահություն է առաջանում, որովհետև գրեթե համոզված ենք, որ նման մութ գործարքները ունեցել են նախապատմություն, բացառություն չէ նաև «Լիդիանը», բայց հիմա հարց է առաջանում՝ ո՞ւր են կոռուպցիոն գործարքները, որոնց մասին խոսվում էր:
– Քրեական գործը հենց դրա վերաբերյալ է եղել… Կան որոշակի բացեր… 10+6 մեղմման միջոցների մասին անընդհատ խոսվում է. 6 հավելյալ կետերը քրեական գործի արդյունքում է առաջարկվել:
– Ներդրողը արևմտյան է, այս հանգամանքը կարո՞ղ է ճնշող ազդեցություն է ունեցել:
– Ո՛չ: Հանդիպումներ, շփումներ, հարցի քննարկում եղել են, բայց դա որոշման վրա ազդող հանգամանք չէ:
Հարցազրույցն ամբողջությամբ՝ տեսանյութում:
