Աշխատանքային շաբաթը սկսվեց բուռն զարգացումներով, որոնք կապված են Ամուլսարի հնարավոր շահագործման հետ։ Վարչապետ Նիկոլ Փաշինյանն այսօր հանդես է գալու թեմայի վերաբերյալ հայտարարությամբ։
Ամուլսարի շուրջ ստեղծված ճգնաժամի հնարավոր լուծումների մասին «Առաջին լրատվական»-ը զրուցել է Բնապահպանության և ընդերքի տեսչական մարմնի նախկին ղեկավար Արթուր Գրիգորյանի հետ։
Դուք պնդում եք, որ Ամուլսարը շահագործելու վերաբերյալ քաղաքական որոշում կայացվել է առնվազն ութ ամիս առաջ, ինչո՞վ է հիմնավորված ձեր պնդումը․ «Առաջին լրատվական»-ի հարցին Բնապահպանության և ընդերքի տեսչական մարմնի արդեն նախկին ղեկավարը պատասխանեց․ «Պնդումը հիմնավորված է շատ կոնկրետ փաստաթղթային հենքով, որոնց ես այս պահի դրությամբ դեռ չեմ անդրադառնա։ Եթե որևէ մեկը գործող իշխանությունից հակառակը կպնդի, որ սա քաղաքական որոշում չէ կամ այն ընդունվել է այս փորձաքննության արդյունքում, այլ ոչ թե ավելի վաղ, ապա նոր ես կներկայացնեմ համապատասխան փաստաթղթեր»։
Այսինքն՝ այս փորձաքննությունը ֆիքտի՞վ դերակատարություն է ունեցել որոշակի ժամանակ շահելու համար՝ հաշվի չառնելով նաև Բնապահպանության և ընդերքի տեսչական մարմնի ընդունած որոշումը․ «Առաջին լրատվական»-ի հարցին Արթուր Գրիգորյանը պատասխանեց․ «Տեսչական մարմնի ստուգման արդյունքում ընդունված որոշումը և այս գործընթացը փոխկապակցված չեն։ Այս գործընթացը եղել է քրեական գործի շրջանակներում, իսկ տեսչական մարմնի ստուգումը եղել է վարչապետի հանձնարարականի հիման վրա։ Միանգամայն տարբեր իրավական գործընթացներ են։ Տեսչական մարմինն ուներ լիազորությունների շատ խիստ սահմանափակ շրջանակ, որը թույլ չէր տալիս գնահատելու ռեալ իրավիճակը։ Բնապահպանության նախարարությունը տվել էր փորձաքննական եզրակացություն՝ վարչական ակտ, և տեսչական մարմնին թույլատրված չէր այդ փաստաթղթի բովանդակությունը քննարկել»։
Մանրամասները՝ տեսանյութում։