Օգոստոսի 8-ին ՀՀ կառավարությունը հաստատեց 2008-ի մարտի 1-ի զոհերի իրավահաջորդներին տրամադրվելիք փոխհատուցման չափը։ Ըստ այդմ, Մարտի 1-ի զոհերի իրավահաջորդներին կտրամադրվի 30, ծանր վնասվածք ստացածներին՝ 15, իսկ միջին ծանրության վնասվածք ստացածներին՝ 5 միլիոնական դրամ:
Կառավարության նույն նիստում հաստատվել էր նաև 2008 թվականի մարտի 1-ից 2-ը Երևանում տեղի ունեցած իրադարձությունների ժամանակ տուժած անձանց աջակցության տրամադրման համար ներկայացվող դիմումի քննարկման և աջակցության տրամադրման կարգը, աջակցության տրամադրման համար ներկայացվող դիմումի ձևը, ինչպես նաև դիմումին կցվող փաստաթղթերի ցանկը:
Աջակցությունը կտրամադրվի միանվագ դրամական օգնության ձևով:
Հիշեցնենք, որ փոխհատուցման այս օրինագիծը հեղինակել էին ԱԺ փոխնախագահներ Լենա Նազարյանը և Ալեն Սիմոնյանը։ Ըստ նրանց հեղինակած նախագծի՝ 2008թ. մարտի 1-2-ը Երևանում տեղի ունեցած իրադարձությունների ժամանակ տուժած անձանց աջակցություն տրամադրելու մասին օրինագծով փոխհատուցում կստանա 63 անձ, ովքեր ստացել են ծանր և միջին ծանրության մարմնական վնասվածքներ։ Օրինագծի համահեղինակ Լենա Նազարյանն ԱԺ-ում օրինագծի քննարկման ժամանակ նշել էր, որ փոխհատուցման հիմքը լինելու է նրանց կողմից ներկայացվող դատաբժշկական փորձաքննության եզրակացությունը։ Այսինքն՝ եթե անձը, որը մարտի 1-2-ի իրադարձությունների ժամանակ վնասվածք է ստացել, սակայն բժշկական փաստաթղթեր, դատաբժշկի ուղեգիր չունի և չի կարողանում հիմնավորել, որ այդ իրադարձությունների ժամանակ տուժած է, նա դուրս է մնալու փոխհատուցման ենթակա անձանց շրջանակից։
Նման մտահոգություններ կառավարության որոշումից հետո արդեն հնչում են։
Մարտի 3-ին ոստիկանության կողմից դաժան ծեծի արդյունքում աչքը կորցրած քաղբանտարկյալ Կարեն Թարխանյանն «Առաջին լրատվական»-ի հետ զրույցում ասաց, որ լուրջ մտահոգություն ունի՝ ինքը ընդգրկվելո՞ւ է փոխհատուցման ենթակա անձանց ցանկում թե՞ ոչ, քանի որ իրեն ծեծի ենթարկելուց հետո որևէ իրավական գործընթաց ծեծի փաստով չի սկսվել։ Ավելին, իրեն այդ վիճակով ծանր մեղադրանք է առաջադրվել Քրեական օրենսգրքի 225 հոդվածի 1-ին մասով (Զանգվածային անկարգություններ) և դատապարտվել ազատազրկման՝ 4 տարի ժամկետով։ «Ինձ մարտի 3-ին ձերբակալեցին, դաժան ծեծի հետևանքով արդեն իսկ վիրահատած աչքս տրաքացրին։ Հիմա աչքս ընդհանրապես չի տեսնում, մյուսով էլ եմ սկսել չտեսնել։ Այդ ժամանակ մամուլը շատ է գրել իմ մասին, որ բերդում կուրանում էի, բայց ինձ մասնագիտացված հիվանդանոց չէին տանում։ Ստացվում է, որ ես ծեծվել եմ, բայց որևէ փաստաթուղթ, դատաբժշկի ուղեգիր չունեմ, ինձ նման ուղեգիր ոչ մեկ չի տվել։ Ըստ Լենա Նազարյանի, հիմա մե՞նք չենք տուժվածը, այլ ինչ-որ ոստիկաններ, որոնց 2008-ին դատաբժշկի ուղեգիր էին տալիս հաշված վայրկյանների ընթացքում։ Իսկ մեզ անգամ մեկ բաժակ ջուր չէին տալիս, ուր մնաց՝ դատաբժշկի ուղեգիր տային։ Ես ուզում եմ հասկանալ, թե փոխհատուցման խնդիրն ինչպես է կարգավորվելու, եթե հիմքը լինելու է դատաբժշկի թուղթը, ինչպես նաև նշվում է մարտի 1-2-ի դեպքերի ժամանակ, բայց ինձ ձերբակալել են մարտի 3-ին ու դաժան ծեծի են ենթարկել»,- ասաց Թարխանյանը՝ հավելելով, որ իրեն ձերբակալած, ծեծի ենթարկած ոստիկանն այժմ էլ բարձր պաշտոն է զբաղեցնում Ճանապարհային ոստիկանությունում. «Եթե մենք ուզում ենք, որ Մարտի 1-ի գործը բացահայտվի, այս ամեն ինչը պետք է ջրի երես դուրս գա»։
2008-ին Թարխանյանը դատապարտվել է 4 տարվա ազատազրկման, իր խոսքերով՝ Նիկոլ Փաշինյանի և Խաչատուր Սուքիասյանի դեմ ցուցմունք չտալու համար։ Սակայն ազատազրկումից մեկ տարի անց հենց առողջական հիմքով ներում է ստացել։
Կարեն Թարխանյանը նշեց, որ Մարտի 1-ի գործի վերաբացումից հետո ինքը դիմել է Հատուկ քննչական ծառայություն, որպեսզի տուժող ճանաչվի։ Գործընթացը, սակայն, ձգձգվում է։ «Ամենաառաջին տուժողը ես եմ եղել, Հայաստանում առաջինը կազմակերպչի հոդվածով ես եմ դատվել, հետո նոր 7-ի գործն է եղել։ Հիմա կարող ա պատահի՝ մենք տուժող չճանաչվե՞նք, ու փոխհատուցում չհասնի՞»,- եզրափակեց Կարեն Թարխանյանը։
Հիշեցնենք, որ ԱԺ-ում քննարկումների ժամանակ Լենա Նազարյանը պատգամավորներին ներկայացրել էր ՀՔԾ-ից ստացած ցուցակը, որում ներգրավված անձինք մարտի 1-2-ին ստացել են ծանր և միջին ծանրության մարմնական վնասվածքներ։ Այդ ցուցակում ներգրավված են, ինչպես նշեցինք, 63 անձինք, որոնցից 13-ը քաղաքացիներ են, 20-ը՝ ոստիկան, 1 պայմանագրային զինծառայող և ոստիկանության ներքին զորքերի 29 ժամկետային զինծառայողներ։
Ուշագրավ է, սակայն, որ Մարտի 1-ի զոհերի հարազատները կատեգորիկ դեմ են, որ ոստիկանները փոխհատուցում ստանան, քանի որ, նրանց խոսքերով՝ նախորդ իշխանության ժամանակ բոլոր ոստիկանները շատ լավ փոխհատուցում են ստացել: