Զանգեզուրի պղնձամոլիբդենային կոմբինատի պոչամբար տանող բետոնապատ պոչատարում նոյեմբերի 14-ին տեղի ունեցած վթարի հետևանքով Քաջարան քաղաքի Աբովյան փողոցի մատույցներում աղտոտվել է Ողջի գետը: ՀՀ բնապահպանության նախարարության աշխատակազմի բնապահպանական պետական տեսչության Սյունիքի տարածքային բաժնի պետ Լևոն Պետրոսյանը տեղեկացրեց, որ արտահոսքի արդյունքում 50 տոննա կախյալ նյութեր են լցվել գետը, հասցրած վնասը՝ 650 հազար դրամ: Հետաքրքիր է, որ միայն 100 հազար դրամով տուգանել են պոչատարի պետին։ «Պատասխանատուն պետք է տեղյակ լիներ պոչատարի մաշվածության մասին ու իմանար, թե որ հատվածից հնարավոր արտահոսք կլինի։ Վթարի դեպքում երկու պահեստային պոչատար կա, որոնց ուղղությունը պետք է փոխեն, իսկ վթարային արտահոսքը պետք է տևի 15 րոպեից ոչ ավելի: Բայց այս դեպքում վթարի տևողությունը սահմանված առավելագույնից երկու անգամ ավելի է տևել և 30 րոպեում մեծ ծավալի արտահոսք եղել գետ»,-ասաց Լ. Պետրոսյանը։