Լուրեր
12 մլն դոլար Ներսես Երիցյանի ձախողված ծրագրի համար. որպես նվաճում ներկայացվող ցիկլոտրոնը սովորական խաղալիք է
  • 09:45
  • 2019-08-19
  • Դիտումներ՝ *

«Այն ցիկլոտրոնը, որը վերագործարկվել է Երևանի Ֆիզիկայի ինստիտուտում, որևէ կապ չունի այս արագացուցչի հետ, որը նախկինում կառուցել է Ալիխանյանը։ Ալիխանյանի կառուցածն այն ժամանակ իսկապես նվաճում էր ֆիզիկայի բնագավառում»,- «Առաջին լրատվական»-ի տաղավարում քննարկման ժամանակ ասաց ՀԱԿ փոխնախագահ, մասնագիտությամբ ֆիզիկոս Լևոն Զուրաբյանը՝ հավելելով, որ Ալիխանյանի կառուցած արագացուցիչը անմխիթար վիճակում է և հայտնի էլ չէ դրա վերագործարկման հեռանկարը։ «Վերագործարկվել է մի երկու մետրանոց ստանդարտ արտադրանք։ Դրա վերագործարկման մեջ ոչ մի նվաճում չկա։ Չեմ կարծում, որ մենք պետք է հրճվենք սրանից»,- ասաց Զուրաբյանը։

Քննարկմանը մասնակից Երևանի Ֆիզիկայի ինստիտուտի նախկին տնօրեն Ռուբեն Մկրտչյանը ևս համակարծիք է, որ սրանից պետք չէ հրճվել։ Նրա խոսքերով՝ դա մի արագացուցիչ է, որն ինքն իրեն աշխատում է, սպասարկում առանձնապես չի պահանջում, շատ քիչ մարդ է պետք։ «Դրա նման ցիկլոտրոններ աշխարհում արդեն իսկ տեղադրված են մոտ 200-ից ավելի։ Այդ տեսանկյունից որևէ նորարարություն չկա։ Վարչապետն ասում էր, որ այս ցիկլոտրոնի գործարկումը թույլ կտա հետազոտություններ անցկացնել ֆիզիկայի բնագավառում և նոր մակարդակի վրա բարձրացնել բժշկական դիագնոստիկան։ Ինձ թվում է, որ վարչապետին սխալ են զեկուցում։ Խոր հետազոտություն չի արվել, պարզապես Ներսես Երիցյանը, կառավարությունը տեսան, որ դա հարմար ձև է վարկ ստանալու համար և շատ չեն էլ մտածել հիմնավորումների վրա, թե ոնց է ամեն ինչ լինելու։

Բայց կարևորը՝ վարկերը հաստատվեցին»,- ասաց Մկրտչյանը՝ հավելելով, որ ամեն դեպքում այս ցիկլոտրոնով կարելի է որոշակի հետազոտություններ անել ուռուցքների հայտնաբերման մասով, բայց հետազոտությունը թանկ է՝ 1000-1200 դոլարի սահմաններում, և այդքան վճարունակ հիվանդներ այսօր Հայաստանում չկան։ Իսկ այդ սարքը կարող է արդյունավետ աշխատել, եթե օրական հետազոտվի նվազագույնը 8 հիվանդ։

Լևոն Զուրաբյանը նշեց, որ իր ուսումնասիրությունները ցույց են տվել, որ ցիկլոտրոնի արդյունավետությունը շատ չնչին է, դա շատ թույլ արագացուցիչ է։ «Սա մի սովորական խաղալիք է, որով որևէ լուրջ գիտական հետազոտություն հնարավոր չէ անել այս հզորությամբ օժտված ցիկլոտրոնով»,- ասաց Զուրաբյանը՝ հավելելով, որ այս «խաղալիքի» վրա արդեն իսկ ծախսվել է 12 միլիոն դոլար ու դեռ հսկայական գումարներ կծախսվեն, քանի որ այն դեռ շահագործված չէ։

Զրույցի ընթացքում քննարկվեց նաև Երևանի Ֆիզիկայի ինստիտուտում ստեղծված «ծանր, ողբալի» վիճակի մասին, այդ վիճակին հասցնողների և ստեղծված վիճակից դուրս գալու ճանապարհների մասին։

Առավել մանրամասն՝ տեսանյութում։

  • Դիտումներ՝ *