«Սա պարզապես բարոյականության հարց է։ Երբ որ իրենց պետք է՝ ազատագրված տարածքները Արցախի մաս են, երբ պետք չէ՝ հեշտությամբ հանձնում են։ Սա ցույց է տալիս, որ հող հանձնելն իրենց համար պրոբլեմ չէ։ Երբ որ իրենց պետք է, իրենք միակ տղամարդն են, երբ որ գործի հանգամանքներով ուրիշ բան է պետք՝ տղամարդկության մասին առհասարակ կարող են մոռանալ»,- «Առաջին լրատվական»-ի հետ զրույցում ասաց ՀԱԿ փոխնախագահ Լևոն Զուրաբյանը՝ անդրադառնալով Ռոբերտ Քոչարյանի պաշտպան Հովհաննես Խուդոյանի հայտարարությանը, թե ազատագրված տարածքները ապրիորի Արցախի մաս չեն։
Զուրաբյանի խոսքերով՝ սա հարցի բարոյական և քաղաքական մասն է, բայց մոռացվում է իրավական մասը, ըստ որի՝ բացարձակ կապ չունի, թե զինված ուժերը, զինծառայողները որ տարածքներից են բերվել։ Խնդիրը, մեղադրանքը նրա մասին է, որ զինված ուժերը չեն կարող կիրառվել ներքաղաքական պրոցեսներին՝ համաձայն Սահմանադրության. «Մեղադրանքը սրա մասին է։ Իսկ Քոչարյանի փաստաբանը, իր հայտարարությամբ, ըստ էության հաստատում է, որ զինված ուժերը մասնակցել են քաղաքական պրոցեսներին։ Մեղադրանքի այդ մասը հաստատում է, պարզապես ընկել են մանրուքների հետևից, թե զինված ուժերը որտեղից են բերվել։ հավատացնում եմ ձեզ՝ դա ամենաքիչ կարևոր մասն է»։
Լևոն Զուրաբյանը մեզ հետ զրույցում անդրադարձավ նաև Մարտի 1-ի գործով քաղբանտարկյալների արդարացման գործընթացին։ Նրա խոսքերով՝ անցումային արդարադատության առումով մարդկանց իրավունքների վերականգնումն ամենակարևոր խնդիրն է։ «Առանց դրա, ոչ մի բան առաջ չի գնա։ Մենք հիմա ինչ ունենք՝ 2008-ին մասսայական անկարգություններ, Տեր-Պետրոսյանի գլխավորությամբ կազմավորված մի բանդա, որին այն ժամանակվա օրինական, ընտրված, փայլուն, պուշուշ իշխանությունները դատել են։ Մենք այս պահին դա ունենք։ Սա է իրականությունը, որը փոխված չէ և դա մեր արդարադատության համակարգի վրա ամենամեծ բիծն է։ Հետևաբար, պրոցեսը պետք է գնա, և մարդիկ պետք է արդարացվեն»,- ասաց Զուրաբյանը՝ հավելելով, որ իրենք պատրաստակամություն ունեն առաջնահերթության կարգով զբաղվել այն անձանց գործերով, ովքեր մահացած են կամ ֆիզիկապես ի վիճակի չեն զբաղվել արդարացման գործերով։