Օրերս եզդիական համայնքի քվոտայով ընտրված ԱԺ պատգամավոր Ռուստամ Բաքոյանը իրաքյան կողմի նախաձեռնությամբ գտնվում էր Իրաքում։
«Իսլամական պետություն» ահաբեկչական խմբավորումն Իրաքում իրականացրեց եզդիների ցեղասպանությունը՝ բազմաթիվ եզդիներ սպանվեցին, գերեվարվեցին և հայտնվեցին ստրկության մեջ։ Ինչպիսի՞ն է իրավիճակը և ի՞նչ իրավիճակ է տիրում Խանկեի փախստականների ճամբարում այսօր․ «Առաջին լրատվական»-ի հարցին ԱԺ պատգամավոր Ռուստամ Բաքոյանը պատասխանեց․ «Ես եղել եմ ոչ միայն Խանկեի, այլ նաև մյուս ճամբարներում։ Եզդիների վիճակն Իրաքում, առհասարակ, ճգնաժամային է, և գնալով իրավիճակն ավելի է բարդանում։ Վերջին հինգ տարիների ընթացքում եզդիների վիճակն էլ ավելի է վատացել։ Եթե նախկինում ՄԱԿ-ը տրամադրում էր նոր վրաններ, և միջազգային կառույցները փորձում էին օգնել, ապա վերջին հինգ տարիների ընթացքում ոչ մի փոփոխություն չի եղել․ վրանները, որոնք վեց ամսվա համար էին նախատեսված, արդեն հինգ տարի է՝ նոր վրաններ չեն տրամադրել։ Մյուս մասերով էլ ոչ մի նոր նախաձեռնություն չի եղել՝ ինչ արվել է հինգ տարի առաջ, նույնն է մնացել»։
Ձեր դիտարկումները, փաստերի հավաքագրումն ինչպե՞ս եք պատրաստվում օգտագործել, ինչպե՞ս եք պատրաստվում այսօր այն բերել օրակարգ․ «Առաջին լրատվական»-ի հարցին Ռուստամ Բաքոյանը պատասխանեց․ «Ես նաև եղա Բաղդադում, մասնակցեցի եզդիական միջազգային կազմակերպության հրավիրած կոնֆերանսին, որին մասնակցում էին նաև իրաքյան քաղաքական ուժերի ղեկավարներ, պատգամավորներ, ինչպես նաև տարբեր երկրների դեսպաններ։ Կոնֆերանսի ժամանակ տարբեր հանդիպումներ ու քննարկումներ եմ ունեցել և ներկայացրել եմ իրավիճակը, թեև իրենք էլ լավ պատկերացնում էին իրավիճակը, որովհետև եզդիական համայնքը պարբերաբար այս մասին բարձրաձայնում է և հանդիպումներ է ունենում Իրաքի քաղաքական ուժերի և այլ պետությունների դեսպանների հետ»։
Մանրամասները՝ տեսանյութում։