«Ինչպես մի անգամ մեր Գլխավոր շտաբի պետն էր ասել, մեր սահմանը կենդանի օրգանիզմ է, և ինչպես յուրաքանչյուր կենդանի օրգանիզմ, կարող են լինել նաև տարբեր դեպքեր: Ադրբեջանն իրեն հարիր դրսևորման ձևերով մշտապես փորձում է լարել իրավիճակը սահմանին, լինում են կրակոցներ ու, ցավոք, վիրավորներ ու զոհեր ենք ունենում, և այդ լարված վիճակը կարող է տևել ընդամենը մեկ ժամ, և ասել, որ սահմանին լարվածություն կա, այդքան էլ տեղին չէ», – սահմանին տիրող իրավիճակի մասին այսօր SHANTNEWS.am-ի հետ զրույցում նշել է ՊՆ մամուլի խոսնակ Արծրուն Հովհաննիսյանը:
Հովհաննիսյանը նշել է, որ վերջին օրերի լարվածությունից հետո հիմա վիճակը հայ-ադրբեջանական սահմանի ողջ երկայնքուվ գտնվում է մեր զինված ուժերի ստորաբաժանումների վերահսկողության տակ, և անհրաժեշտության դեպքում կլինեն արժանի հակահարվածներ:
Արծրուն Հովհաննիսյանն անդրադարձել է նաև ամառային զորակոչին ու նշել, որ զորակոչը կազմակերպվել ու անցել է՝ ըստ նախատեսված պլանի, վերջնական ամփոփ տվյալներ կներկայացնի Պաշտպանության նախարարությունը ձմեռային զորակոչից առաջ, բայց ինչպես յուրաքանչյուր զորակոչին, այս անգամ ևս եղել են բողոքարկումներ, որոնք համապատասխան հանձնաժողովի կողմից դարձել են քննության առարկա:
