ԱԺ պատգամավոր Արման Բաբաջանյանը ֆեյսբուքյան իր էջում գրել է.
Հայրենիքը սկսվում է սահմանից։ Թշնամու նշանառության տակ բնակվող ցանկացած քաղաքացու բարեկեցությունն ու ապահովությույնն ազգային անվտանգության կարևորության հարց է։
Սահմանամերձ բնակավայրերի բնակիչների զբաղվածությունը պետք է դառնա պետության առաջնային հոգածության առարկան։ Վայոց ձորի սահմանապահ գյուղական համայնքներում զբաղվածության հարցի հիմնարար լուծման հնարավորություններ ենք փնտրում։ Խնդիրը լրիվ իրագործելի է։ Մի քանի իրատեսական գաղափարներ ունենք սահմանապահ Խաչիկ, Խնձորուտ, Նոր Ազնաբերդ և Բարձրունի համայնքների համար։ Բայց չենք սահմանափակվելու այդքանով։
Այսօր շատ կարևոր հանդիպում էի նախաձեռնել Վայոց ձորի մարզպետարանում շուրջ վաթսուն համայնքապետերի և համայնքի ձեռնարկատերերի և Արտլանչ ընկերության սեփականատեր Բակուր Մելքոնյանի հետ։ Ինչպես հայտնի է բանակի սննդի կազմակերպման ծրագիրն իրականացնող վեց կազմակերպություններից մեկը Արտլանչ ընկերությունն է։ Նպատակ ունեմ, որպեսզի Վայոց ձորի բանակային ստորաբաժանումների սննդի ապահովման աշխատանքներում ներգրավվեն տեղական արտադրող գյուղացիական տնտեսությունները։ Բանակի սպառողական ներուժը բավարար է, որպեսզի հիմնավորապես հնարավոր լինի լուծել մարզի գյուղացիների զբաղվածության խնդիրը։
Հույս ունեմ այս հանդիպումը մեծապես կօգնի սահմանային այս կարևոր, ռազմավարական ուղղության վրա բնակվող մեր հայրենակիցների զբաղվածության խնդիրը արժանապատվորեն կազմակերպելու համար։
Հանդիպումը պատշաճ կազմակերպելու համար շնորհակալություն Վայոց ձորի մարզպետ Տրդատ Սարգսյանին։
Շնորհակալություն նաև Արտլանչ ընկերության սեփականատիրոջը՝ Բակուր Մելքոնյանին՝ հանդիպմանը համբերատար և լայնախոհ մասնակցության համար։
