«Առաջին լրատվական»-ի զրուցակիցն է Արցախի խորհրդարանի «Ժողովրդավարություն» խմբակցության պատգամավոր Վարդգես Բաղրյանը։
-Պարոն Բաղրյան, դուք նախկինում անդրադարձել եք Ռոբերտ Քոչարյանի գործին, այն քաղաքական որակել։ Նրա փաստաբանն այժմ հայտարարում է, որ Արցախի ազատագրված տարածքները Արցախի Հանրապետության մաս ապրիորի չեն կարող համարվել, ուստի, այդ տարածքից 2008թ․փետրվար–մարտին Երևան բերված ուժերը չեն կարող լինել Արցախի Հանրապետության զինված ուժեր։ Ի՞նչ կարծիք ունեք այս հայտարարության մասին։
-Եթե մի բանից տեղյակ չեմ, չեմ կարող մեկնաբանել։
-Փաստաբանի հայտարարությունից տեղյա՞կ չեք։
-Տեղյակ եմ, բայց ես չգիտեմ՝ որտեղից են բերել, բերե՞լ են արդյոք, թե՞ ոչ։ Ես չեմ կարող ասել։ Դա իմ հարցը չէ։
-Հարցը հետևյալն է. ըստ Քոչարյանի փաստաբանի՝ ազատագրված տարածքները Ղարաբաղի մաս չեն կազմել, դուք այս դիտարկումն ընդունո՞ւմ եք։
–Ազատագրված տարածքներ ձևակերպում վաղուց գոյություն չունի, այսպես կոչված, ազատագրված տարածքները Սահմանադրությամբ ամրագրված են որպես Արցախի մաս, այդպիսի ձևակերպում վաղուց գոյություն չունի։
-Ձեզ չի մտահոգո՞ւմ, որ, ըստ Քոչարյանի պաշտպանի, դրանք Հայաստանի մաս չեն, չէ՞ որ դուք նրա դեմ հարուցված գործը քաղաքական եք համարել։
-Անկեղծ ասած, ես կոնկրետ չեմ հետևել, բայց եթե ասում եք՝ չեմ կասկածում՝ այդպես է ասել, թե ոչ։ Կրկնում եմ՝ չկա նման ձևակերպում, այդ տարածքներն ամրագրված են Արցախի Հանրապետության Սահմանադրությամբ։ Այսինքն՝ նախկինում էին ասում ազատագրված տարածքներ, չկա նման բան։
-Բայց դուք երևույթն ինչպե՞ս եք գնահատում, երբ մարդու շահերի պաշտպանության համար նման հայտարարություն է արվում՝ առ այն, որ այդ տարածքները Ղարաբաղի մաս չեն։
-Դուք այնպիսի հարցեր եք առաջադրում, որ ես չեմ կարող մեկնաբանել, ես պաշտպանի ասածները չեմ մեկնաբանի։ Բայց կրկնում եմ իմ ասածները՝ Ռոբերտ Քոչարյանի գործը քաղաքական է, որքան ես վերլուծում ու անալիզի եմ ենթարկում՝ այդպիսի տպավորություն եմ ստանում։
-Իսկ այսպիսի հայտարարությունները ձեր վերլուծության առարկան չե՞ն լինի, չէ՞ որ խոսքը մեր տարածքների, մեր հայրենիքի մասին է։
-Բայց դա ի՞նչ կապ ունի կոնկրետ Քոչարյանի գործի հետ։
-Նրա պաշտպանը, անդրադառնալով Ղարաբաղից Հայաստանի ներքաղաքական զարգացումներին միջամտելու համար՝ Քոչարյանի հրամանով զորք բերելու հանգամանքին, նշել է, որ այդ զորքը բերվել է Արցախի ազատագրված տարածքներից, որը Արցախի Հանրապետության մաս ապրիորի համարվել չի կարող։
-Հիմա տարբեր բաներ են ասում, ես մի հարցի, որ չեմ տիրապետում, հստակ տեսակետ չեմ կարող արտահայտել։ Գիտեք՝ այս օրերին ամենատարբեր կարծիքներ են հնչում, մեկն ասում է՝ բերել են, մյուսն ասում է՝ չեն բերել, ես այդ ոլորտի մարդ չեմ և չեմ կարող ասել։
-Հարցն այն է, որ իրենք բերելու փաստը չեն էլ հերքում, մարդիկ կասկածի տակ են դնում այդ տարածքների՝ Արցախի մաս լինելու հանգամանքը։
-Կարող է և բերել են, կամ չեն բերել, ես չեմ կարող հերքել կամ ժխտել։ Սովոր եմ մեկնաբանել մի բան, որին հստակ տեղյակ եմ, ես այդ գործընթացներից տեղյակ չեմ։
