Աշխարհը, որտեղ մենք ապրում ենք, այս պահին գտնվում է տեխնոլոգիական զարթոնքի փուլում. այս գաղափարախոսությունն ունեն նյույորքաբնակ անվանի հայ արվեստագետ Տիգրան Ձիթողցյանի աշխատանքները: Օգոստոսի 22-29-ը «Նուռ» ցուցասրահում կկայանա Տ. Ձիթողցյանի «Երեք հայելի» ցուցահանդեսը:
Արվեստագետի կարծիքով՝ ինֆորմացիայի ավելցուկ կա մեր կյանքում: «Իսկ արվեստը միշտ արտացոլում է և պետք է արտացոլի արդիական խնդիրներ: Ես առաջին հերթին որպես դիտորդ եմ անդրադառնում հարցերին և փորձում եմ իմ միջով անցկացնել ու ինձ հետաքրքրող և հուզող հարցերի շուրջ վիզուալ աշխատանք կատարել»,- «Առաջին լրատվական»-ի հետ զրույցում ասաց նկարիչը:
Իր արվեստում Ձիթողցյանը փորձել է համադրել այսօրվա արժեքները և Վերածննդի դարաշրջանի արվեստի գործերում գերակշռող գույներն ու տեխնիկաները. «Եթե առաջ իդելացված սրբապատկերներ էին, այսօր որո՞նք են մեր իդեալացված պատկերները. սրբապատկերները փոխարինվել են տեխնոլոգիայով, և ես իմ աշխատանքներում արտացոլել եմ այդ փոխված իդեալները՝ կլասիկ պատկերի մեջ»,-նշեց մեր զրուցակիցը, որի նկարներից մեկում Աստվածամայրն է՝ ձեռքին բջջային հեռախոս, երեխային անտարբեր գրկած:
Նկարչի դիտարկմամբ՝ բարձր տեխնոլոգիաները և համացանցը քանդում են ընտանիքը. «Ընտանիքում տարանջատում է գնում: Մարդիկ դառնում են ինքնակենտրոնացված, ինտերակտիվ շփումները գերակշռում են, ֆիզիկական շփումը նվազում է, ինչն էլ հեռացնում է մարդկանց: Փոխվում են հարաբերությունները թե՛ ընտանիքում, թե ընկերների միջև »:
Մանրամասն՝ տեսանյութում: