Արդեն 2-3 ամիս է՝ տնտեսվարողները դժգոհում են, որ չեն կարողանում ձեռք բերել 60 հազար դրամ արժողությամբ նոր սերնդի ՀԴՄ սարքեր։ ՊՈԱԿ-ից տնտեսվարողներին պատասխանում են, որ ՀԴՄ սարք չկա, չգիտեն էլ՝ երբ կլինի։
Նախօրեին նորաբաց ԱՁ-ի տնօրենը «Առաջին լրատվական»-ի հետ զրույցում ասաց, որ նույն խնդրին է բախվել ՊԵԿ-ում։ Երբ գնացել է ՀԴՄ սարք ձեռք բերելու համար, ՊԵԿ հսկիչ-դրամարկղային մեքենաների ներդրման գրասենյակից նույն պատասխանն են տվել՝ ՀԴՄ սարք չկա, բայց երաշխավորել են, որ ՊԵԿ-ը ցանկացած պահի կարող է գալ ու տուգանել առանց ՀԴՄ-ի վաճառք իրականացնելու համար։
Տնտեսվարողը մեզ հետ զրույցում պատմեց, որ անգամ ՊՈԱԿ-ում առաջարկել է թղթի վրա ձևակերպել, որ ինքը հարկերից չի խուսափում, ինքնակամ եկել է, որ ՀԴՄ սարք գնի։ Առաջարկել է արձանագրել, որ ինքը եկել է գնելու ՀԴՄ սարք, բայց ՊՈԱԿ-ից չեն տրամադրել։ «Ես առաջարկեցի թուղթ գրենք, որ ես եկել եմ գնելու, իրենց չեն վաճառել ինձ էդ սարքը, որ երբ հարկայինից գան ու տեսնեն, որ ես ՀԴՄ սարք չունեմ, թուղթը ցույց տամ, որ ես ամեն ինչ արել եմ էդ սարքը ունենալու համար, բայց ՊԵԿ-ից ինձ չեն տվել։ Բայց ինձ ասացին, որ իրենք նման թուղթ չեն կարող տալ, բայց կարող են երաշխավորել, որ ՊԵԿ-ը ամեն պահի կարա գա ստուգման ու տուգանի ինձ ՀԴՄ սարք չունենալու համար»,- ասաց մեր զրուցակիցը։
Ուշագրավը, սակայն, ՊԵԿ-ի գործելաոճն է։ ՊԵԿ հսկիչ-դրամարկղային մեքենաների ներդրման գրասենյակից հարկայինի տուգանքներից խուսափելու համար ուղղորդում են ՀԴՄ սարքեր գնել «սև շուկայից»՝ «ձեռքի վրայից», որտեղ լիքն է։ Մեր զրուցակից տնտեսվարողին ևս ՊԵԿ-ից հորդորել էին գնալ և «list.am»-ից գնել նոր սերնդի ՀԴՄ սարք։ Նկատենք, սակայն, որ նույն «ձեռքի վրա» ՀԴՄ սարքերը վաճառվում են կրկնակի թանկ՝ 90-170-180 հազար դրամով։
Մինչդեռ հիշում ենք, որ փետրվարի 5-ին վարչապետ Նիկոլ Փաշինյանը ՊԵԿ նախագահ Դավիթ Անանյանի հետ հանդիպումից հետո հայտարարեց, որ նոր սերնդի ՀԴՄ-ները տնտեսվարողներին պետք է վաճառվեն 60 հազար դրամով` 160 հազար դրամի փոխարեն:
Թե ինչու պետք է տնտեսվարողը գնա «սև շուկայից» ՀԴՄ սարք գնի կրկնակի, եռակի թանկ գնով, հասկանալի չէ։ Սա ոչ այլ ինչ է, քան ՊԵԿ անգործություն։ Ընդ որում՝ այդ անգործությունը շարունակվում է արդեն 3 ամսից ավելի։
Այս միտումնավոր անգործությունը թույլ է տալիս ենթադրելու, որ գուցե ՊԵԿ որոշ աշխատողներ գերշահույթներ ստանալու յուրօրինակ մեխանիզմ են մշակել՝ տնտեսվարողին փակուղու առաջ կանգնեցնելով ստիպել ՀԴՄ սարքերը կրկնակի թանկ գնով գնել «ձեռքի վրայից»։ Իսկ թե դրանք ինչպե՞ս են հայտնվել «սև շուկայում», կամ ինչո՞ւ տնտեսվարողները չեն կարողանում հեշտությամբ ձեռք բերել այդ սարքերը՝ հարցերին թերևս պետք է պատասխանի ՊԵԿ-ը։
Նշենք նաև, որ կառավարությունը, այս տարվա մարտի 29-ի որոշմամբ, ՀԴՄ-ների ձեռքբերման գործընթացն ազատականացրեց՝ թույլատրելով թե՛ ֆիզիկական, թե՛ իրավաբանական անձանց ներկրել նոր սերնդի ՀԴՄ սարքեր։ Բայց դրանից, փաստորեն, խնդիրը չլուծվեց։