Յուրաքանչյուր հեղափոխություն ունենում է իր երգը. թավշյա հեղափոխության երգը «Իմ քայլն» էր՝ իր էքզիստենցիալ կրկներգով. «Դու մենակ չես, մենակ չես, մենակ չես»: Ի՞նչ գործընթացներ են տեղի ունեցել, որոնք ապացուցում են, որ մենք մենակ չենք: «Առաջին լրատվական»-ի հետ զրույցում անդրադառնալով այս հարցին՝ երգահան Էդուրադ Զորիկյանն ընդգծեց. «Թեկուզ միայն այն առումով, որ հեղափոխության ընթացքին մասնակցեց ամբողջ հայությունը, սա բացառիկ երևույթ է: Ես երբևէ չեմ նկատել, որ ներհայաստանյան որևէ երևույթ նման արձագանք ստանար, և որ ամբողջ աշխարհի հայությունն արձագանքեր: Կարծում եմ՝ անգամ 88թ. Արցախյան շարժումն այս աստիճանի արձագանք չստացավ: Իհարկե, դրսից գալիս էին և միանգամից օդանավակայանից ռազմաճակատ մեկնում, սփյուռքահայությունը թե՛ անհատական մասնակցություն է ունեցել, թե՛ ֆինանսական և թե զենք, զինամթերք, սարքավորումներ է ուղարկել, բայց ես չէի համեմատի այս երկու շարժումները»:
«Ես «Մերժիր Սերժին» ասվածի տակ հասկանում եմ մերժի՛ր գողությունը, մերժի՛ր ստախոսությունը: Այդ ամեն ինչը փլուզվեց, որովհետև ստի վրա կառուցված համակարգ էր: Այն, ինչ կատարվում էր Հայաստանում, հիմքից քանդում էր երկիրը. նկատի ունեմ բյուջեի և դրսից եկող գումարների մսխումը, գրպանելը: Երկիրը կործանման ճանապարհին էր»,- նշեց երգահանը:
Մեր զրուցակիցն անդրադարձավ նաև Ռոբերտ Քոչարյանի պաշտպանի հայտարարությանը, ըստ որի՝ Արցախի ազատագրված տարածքները Արցախի Հանրապետության մաս չեն կարող համարվել ապրիորի, այնտեղից բերված ուժերը չեն կարող համարվել Արցախից բերված ուժեր: Էդուարդ Զորիկյանը համակարծիք է, որ իր պաշտպանյալի մաշկը փրկելու համար «հերոսը» սակարկում է հայրենիքը: «Սա ահավոր տխուր երևույթ է: Ռ. Քոչարյանի նախագահության տարիներին էլ բազմաթիվ երևույթներ կատարվեցին. ժանդարմական համակարգում կա՛մ ասածն անտեսվում էր, կա՛մ սպանում էին… Իմ ընտանիքը Հյուսիսային պողոտայի «բուլդոզերի տակ ընկածներից» է. մարդկանց զրկեցին օջախներից, ստացվում էր, որ քո հայրենքիում սեփականության իրավունք չունեիր…»:
Զորիկյանի դիտարկմամբ՝ Քոչարյանի դատական պրոցեսը տանում են դեպի փակուղի: «Ես առաջարկում եմ ոչ թե ընկնել դատական պրոցեսների ետևից, այլ իր իսկ ընդունած ձևերով ունեզրկել, վերցնել և՛ իրեն, և՛ իր ընտանիքին, շրջապատին ու իր կլանին պատկանող սեփականությունը»:
Մանրամասն՝ տեսանյութում:
