Ղրղզստանի իշխանությունները որոշել են քրեական գործ հարուցել նախկին նախագահ Ալմազբեկ Աթամբաևի կնոջ՝ Ռաիսայի դեմ, հաղորդում է ՏԱՍՍ-ը:
«Իմ դեմ հիմա քրեական գործ է հարուցվում»,- ասել է նա լրագրողներին:
Աթամբաևայի խոսքերով, ինքը դեռ չգիտի, թե որ հոդվածով է գործը բացվելու:
Ալմազբեկ Աթամբաևը մեղադրվում է սպանություն կազմակերպելու և առանձնապես ծանր այլ հանցագործությունների մեջ: Պետության նախկին ղեկավարը մեղադրվում է նաև անկարգություններ կազմակերպելու, պատանդ վերցնելու և իշխանության ներկայացուցչի նկատմամբ բռնություն գործադրելու մեջ: Նրան ցմահ բանտարկություն է սպառնում:
Օգոստոսի 7-ին Ղրղզստանի հատուկջոկատայինները փորձել են ձերբակալել Աթամբաևին Բիշքեկի մերձակայքում գտնվող Քոյ-Թաշ գյուղում գտնվող իր տանը: Նախկին նախագահի կողմնակիցները դիմադրություն են ցույց տվել ուժայիններին: Հաջորդ օրը հատուկջոկատայինները կրկին փորձել են բերման ենթարկել Աթամբաևին, և բախումները շարունակվել են: Հարձակման երրորդ փորձից հետո քաղաքական գործիչը հանձնվել է իշխանություններին: Բախումների ընթացքում վիրավորվել է 136 մարդ, 14-ը հոսպիտալացվել են, մեկ հատուկջոկատային զոհվել է: