Այսօր վաղ առավոտյան Վարդենիսի Ծովակ համայնքի բնակիչները փակել էին համայնքի ճանապարհը։
Բողոքի համար հիմք էր հանդիսացել երեկ երեկոյան համայնքի բնակիչներից Տարոն Խաչատրյանի ձերբակալությունը։ Խաչատրյանն աշխատում է «Սևան» ազգային պարկում։ Երեկոյան ձերբակալվել է կաշառք վերցնելու գործով։ Նրա դեմ ցուցմունք է տվել մեկ այլ քաղաքացի՝ պնդելով, որ անտառից ծառահատում իրականացնելու համար 40 հազար դրամ կաշառք է տվել Խաչատրյանին։
Ծովակի բնակիչներն այսօր արդեն փողոց են դուրս եկել՝ պահանջելով ազատ արձակել Խաչատրյանին: Ճանապարհ փակած բնակիչները «Առաջին լրատվական»-ի հետ զրույցում ասացին, որ մեղադրանքը կեղծ է։ Ցուցմունք տված անձին ոստիկանությունն ու ԱԱԾ աշխատողները տարել 6 ժամ պահել են, որից հետո նա նման ցուցմունք է գրել, թե՝ 40 հազար դրամ կաշառք է տվել «Սևան» ազգային պարկի աշխատակցին ծառահատման համար։
«Այս գործում հստակ շահագրգռվածություն կա։ Շահագրգռված են տեղի ոստիկանապետն ու ԱԱԾ պետը։ Ոստիկանապետը ժամանակավոր պաշտոնակատար է, ինքնահաստատման խնդիր ունի, որ ցույց տա, թե ինքն արժանի աշխատող է. դրա համար էլ նման ստոր քայլերի են դիմում։
Ամբողջ օրը ընկած են մարդկանց հետևից, կանչում, համոզում են, որ ազգային պարկի աշխատողների դեմ ցուցմունք տան, ասեն՝ սա ենք տվել, այսքան ենք տվել, այս աշխատանքի համար և այլն»,- ասաց ճանապարհ փակած ակցիայի մասնակիցներից մեկը՝ չցանկանալով, որ իր անունը հրապարակվի, որպեսզի զերծ մնա ոստիկանության հետապնդումներից։
Մեր զրուցակցի խոսքով՝ իրենց պահանջն է նաև թույլատրել որոշակի չափով ձկնորսություն լճից։ «Սաղ տեղերից մարդիկ մտնում են լիճը ձուկ բռնում, իսկ մեր համայնքում կատեգորիկ արգելված է։ Բայց ինչո՞վ է պայմանավորված էդ խտրականությունը, կարո՞ղ է որևէ մեկը մեզ բացատրել։
Մենք պահանջում ենք, որ հավասար մոտեցում լինի»։
Բողոքի ակցիայի մասնակիցները քիչ առաջ բացել են ճանապարհը, բայց հանդիպում են պահանջում տեղի ոստիկանապետի ու ԱԱԾ պետի հետ։ Ասացին, որ եթե հանդիպումները չկայանան, ու Արամ Խաչատրյանն ազատ չարձակվի, իրենք նորից ամբողջ գյուղով ոտքի են կանգնելու և ճանապարհը փակեն։