Սպիտակ տունը մտադիր է ավելի քան 4 մլրդ դոլարով կրճատել միջազգային օգնության հետ կապված ԱՄՆ-ի ծախսերը, գրում է Politico պարբերականը։
Աղբյուրների տվյալներով՝ ԱՄՆ-ի վարչակազմում համապատասխան նախագիծը նախապատրաստել է Սպիտակ տան բյուջետային վարչությունը։ Փաստաթղթի համաձայն՝ Միջազգային զարգացման ամերիկյան գործակալության ծախսերը (USAID) կկրճատվեն 2,3 մլրդ դոլարով, իսկ միջազգային օգնության ծախսերը, որոնք կատարվում են պետքարտուղարության շրջանակում, չեն հասնի 2 մլրդ դոլարի։
Բյուջեում փոփոխությունները կարող են արդեն հաջորդ շաբաթ Կոնգրեսին ներկայացվել։ Օրենսդիրները 45 օր կունենան՝ նախագահի փաթեթը հաստատելու կամ մերժելու համար։ Սակայն քննարկման ժամանակ վիճելի հիմնադրամները կսառեցվեն, իսկ սեպտեմբերի 30-ից հետո, երբ ԱՄՆ-ում կավարտվի ֆինանսական տարին, դրանք մեխանիկորեն կչեղարկվեն։