Ռոբերտ Քոչարյանի պաշտպաններից Հովհաննես Խուդոյանը երեկ հայտարարել է, թե Արցախի ազատագրված տարածքները չեն կարող Արցախի Հանրապետության մաս համարվել ապրիորի: Քաղաքագետ Ռուբեն Մեհրաբյանը կարծում է, որ դա հավանաբար պաշտպանի ոտքի վրա կատարած իմպրովիզացիան է: «Եթե դա այդպես չէ, ապա գործ ունենք սարսափելի իրողության հետ, ինչին չեմ ցանկանում հավատալ»,- «Առաջին լրատվական»-ի հետ զրույցում ասաց քաղաքագետը՝ հավելելով, որ սա ցույց է տալիս, թե որքան թույլ են Ռ. Քոչարյանի պաշտպանության փաստարկները, որ նրանք արդեն նույնիսկ անթույլատրելի, կարմիր գծերն են սկսել անցնել՝ կարևոր չէ՝ միտումնավոր թե իմպրովիզացիայով: «Եթե Քոչարյանն ունի այսպիսի պաշտպանություն, ապա նրան մեղադրողներ այլևս պետք չեն»,- նշեց Ռ. Մեհրաբյանը: Նա նաև նկատեց, որ դատապաշտպանները հաճախ նույնանում են իրենց մեղադրյալի հետ և խախտելով, ոտնահարելով մասնագիտական էթիկայի նորմերը՝ մտնում են դաշտեր, որտեղ անելիք չունեն:
«Այն, որ Քոչարյանն իր կաշին փրկելու համար պատրաստ է սակարկել ցանկացած հարցով, նոր երևույթ չէ»,- ընդգծեց ԱԺ պատգամավոր Սոս Ավետիսյանը: -Այս հայտարարությունը հաստատ Հայաստանի հանրությանը չէր ուղղված, որովհետև մեր երկրում այդ հարցի վերաբերյալ կոնսենսուսն այլ է: Հաստատ սա այն դեպքերից է, երբ պատրոնաժ են փորձում գտնել Հայաստանից դուրս»: Պատգամավորի կարծիքով՝ պաշտպանը այդ հայտարարությունն արել է Քոչարյանի անունից:
Վերլուծաբան Վահագն Ալեքսանյանը հավելեց, որ Ռ. Քոչարյանի գրասենյակից չկա տեղեկատվություն այն մասին, որ տվյալ պաշտպանը հեռացվել է պաշտպանական թիմից. «Այսինքն՝ լիակատար համաձայնություն կա այս եզրույթների հարցում պաշտպանական թիմի և Ռ. Քոչարյանի միջև… Ես չեմ զարմանա, եթե Քոչարյանի թիմը մի օր հարցականի տակ դնի Հայաստանի սուվերենությունը»:
Մանրամասն՝ տեսանութում: