Լուրեր
Քոչարյանի պաշտպանությունը կարող է վտանգել բանակցային գործընթացը

Այսօր ամենաշատ քննարկվող թեմաներից է Հայաստանում սահմանադրական կարգի տապալման համար մեղադրվող երկրորդ նախագահ Ռոբերտ Քոչարյանի փաստաբանի երեկվա աղմկահարույց հայտարարությունը, ըստ որի, Արցախի ազատագրված տարածքները, իրենց համոզմամբ, Արցախի Հանրապետության մաս ապրիորի չեն կարող համարվել, ուստի այդ տարածքից 2008թ. փետրվար-մարտին Երևան բերված ուժերը չեն կարող լինել Արցախի Հանրապետության Զինված ուժեր:

«Ուզում եմ հավատալ, որ փաստաբանի այս հատրարությունը պարզ սայթաքում էր, հակառակ դեպքում մանր շահադիտական նկատառումների հետևանքով ողջ բանակցային գործընթացը և համազգային նպատակները կարող են կասկածի տակ դրվել»,- այս մասին «Առաջին լրատվական»-ի հետ զրույցում ասաց ԱԺ Պետաիրավական հարցերի մշտական հանձնաժողովի նախագահ Վլադիմիր Վարդանյանը՝ ընդգծելով նաև, որ Արցախի Սահմանադրությունը հասանելի է բոլորին, առկա է համացանցում: Հիշեցնենք՝ Արցախի Սահմանադրության համաձայն՝ ազատագրված տարածքները համարվում են Արցախի անբաժան մաս:

«Մենք գործ ունենք մի իրադրության հետ, որը բավականին լայն սպեկտոր է ներառում, և քրեական իրավունքի փաստաբանը կարող է սահմանադրական կամ միջազգային իրավունքներից քաջատեղյակ չլինել և նման հայտարարություններ անել»,- նշեց մեր զրուցակիցը:

Նրա դիտարկմամբ՝ փաստաբանի այդ քաղաքական հայտարարությունը իր վստահորդի կարգավիճակը ո՛չ բարելավում է, ո՛չ վատթարացնում. «Այդ հայտարարությունը, ըստ էության, կապ չունի գործի հետ: Երկրորդ՝ քաղաքական այնպիսի հայտարարություններ անելը, որոնք կարող են պետությանը վտանգել, անթույլատրելի է»,- նշեց Վլադիմիր Վարդանյանը՝ հավելելով, որ պետք է պարզել՝ փաստաբանը հանդես է գալիս իր վստահորդի անունից, թե իր տեսակետն է ներկայացնում այդ հարցի վերաբերյալ: Նրա խոսքով՝ հասկանալի չէ, որ դեպքում է փաստաբանը հանդես գալիս իր վստահորդի անունից և որ դեպքում է ներկայացնում իր տեսակետը:

 

Մանրամասն՝ տեսանյութում:

  • Դիտումներ՝ *