Լուրեր
Ամուլսարի հարցով քաղաքական որոշում չի լինելու. փորձաքննության արդյունքները ճակատագրական են լինելու
  • 21:15
  • 2019-08-15
  • Դիտումներ՝ *

«Ես մասնագետ չեմ։ Մասնագետները պետք է կարծիքներ հայտնեն, գնահատականներ տան՝ դրական կամ բացասական, և նոր որոշում կայացվի»,- «Առաջին լրատվական»-ի հետ զրույցում ասաց փոխվարչապետ Տիգրան Ավինյանի գրասենյակի ղեկավար Վարագ Սիսեռյանը։ Նա այսօր էլ հանդիպել էր բնապահպաններին կառավարության շենքի դիմաց, բնապահպանները Սիսեռյանից պահանջում էին հանդիպում կազմակերպել վարչապետի հետ։ Նա ասաց, որ վարչապետի օգնականին փոխանցել է բնապահպանների մտահոգությունները։
Վարագ Սիսեռյանն ասաց, որ չգիտի, թե կառավարությունն ինչ որոշում է կայացնելու Ամուլսարի հարցով, բայց պնդեց, որ այդ որոշումը չի լինելու քաղաքական որոշում։ «Ես չէի ասի՝ քաղաքական։ Ես վստահ եմ, որ փորձաքննության արդյունքները ճակատագրական են լինելու և շատ ավելի մեծ նշանակություն են ունենալու»,- ասաց Սիսեռյանը՝ հավելելով, որ հիմա էլ կառավարությունը ուսումնասիրում է բոլոր կարծիքները, հետևում է քննարկումներին։

Սիսեռյանի խոսքերով՝ Ամուլսարի չշահագործումը կարող է որոշակի բացասական ազդակներ ուղարկել դրսի ներդրողներին, ներդրումների ներգրավվման վրա կարող են որոշակի ազդեցություն ունենալ, բայց ասել, որ որոշման հիմքում այդ հարցն է դրվել, սխալ է։ «Ասել, որ ներդրումների ֆակտորով փորձել են մեզ ճնշել, սխալ է։ Այդպիսի բան մեր հանդիպումների ժամանակ, դեսպանների հետ հանդիպումների ժամանակ չենք զգացել և, անկեղծ ասած, մենք թույլ էլ չէինք տա մեզ որևէ բանով ճնշել։ Ամուլսարի որոշումը լինելու է կառավարության սուվերեն որոշումը՝ առանց արտաքին որևէ ճնշման»,- ասաց Սիսեռյանը։

Առավել մանրամասն՝ տեսանյութում։

  • Դիտումներ՝ *